Kryeministrja daneze në udhëtim të stuhishëm në BE ndërsa shqetësimi i Grenlandës rritet

Kryeministrja e Danimarkës, Mette Frederiksen, realizoi një udhëtim të shpejtë në tre kryeqytete evropiane, të martën, disa ditë pas rikthimit të interesit të presidentit amerikan Donald Trump për të blerë Grenlandën.

Në një ditë, Frederiksen u takua me kancelarin gjerman Olaf Scholz në Berlin, presidentin francez Emmanuel Macron në Paris dhe liderin e NATO-s, Mark Rutte, në Bruksel, transmeton Telegrafi.

Megjithëse udhëheqësit u tha se diskutuan çështje të tilla si Ukraina dhe sulmet hibride ruse në Detin Baltik, udhëtimi i shpejtë i kryeministres daneze pasqyronte shqetësimin që po ndjehej në Danimarkë për komentet e përsëritura të Trump-it.

Ishulli i Arktikut, Grenlanda, është një territor autonom i Danimarkës, transmeton Telegrafi.

Megjithatë, Trump ka shprehur disa herë dëshirën për ta blerë Grenlandën për arsye sigurie kombëtare dhe ka refuzuar të përjashtojë mundësinë e përdorimit të forcës ushtarake ose ekonomike për ta realizuar këtë.

“Mendoj se do ta kemi,” tha ai të shtunën.

Egede, e cila ka shtyrë agjendën për pavarësinë e Grenlandës nga Danimarka, insistoi javën e kaluar se populli i Grenlandës “nuk dëshiron të jetë amerikan”.

Në një konferencë shtypi pas takimit të Frederiksen dhe Scholz të martën në mëngjes, asnjë nga liderët nuk e përmendi drejtpërdrejt çështjen e Grenlandës apo Trumpit.

Megjithatë, kur diskutuan nevojën për të respektuar kufijtë dhe për t’i respektuar ata pa përdorur forcë, siç ka ndodhur me Rusinë në Ukrainë, Scholz theksoi se ky koncept vlen për “të gjithë” dhe shtoi në anglisht: “Për këdo që mund të preket”.

Në Paris, Frederiksen i tha gazetarëve se kishte marrë “një mbështetje të madhe” nga aleatët evropianë, dhe se kishte një “mesazh shumë të qartë që natyrisht duhet të ketë respekt për territorin dhe sovranitetin e shteteve”.

Dhe gjatë ndalesës së saj të fundit në Bruksel, Frederiksen tha se nuk kishte arsye të besonte se kishte një kërcënim ushtarak ndaj Grenlandës apo Danimarkës.

Ajo riafirmoi se ende e sheh SHBA-në si aleatin më të ngushtë të Danimarkës, por kur u pyet për marrëdhënien midis Evropës dhe Trump, ajo u përgjigj: “Mendoj se të gjithë në Evropë mund të shohin se do të jetë një bashkëpunim i ndryshëm tani”.

Frederiksen dhe Rutte u pajtuan që aleatët duhet të përqendrohen në forcimin e mbrojtjeve në Arktik, raporton Reuters duke cituar një burim.

Ndërkohë, Frederiksen shmangu përmendjen drejtpërdrejt të çështjes së Grenlandës, por ministri i Jashtëm danez, Lars Lokke Rasmussen, i tha gazetarëve se Trump “nuk do ta ketë Grenlandën”.

“Populli i Grenlandës është një popull, edhe në kuptimin e ligjit ndërkombëtar”, shtoi Lokke.

Kur u pyet nëse Trump do të duhej të “pushtonte” Grenlandën për ta marrë, Lokke tha se nuk do t’i jepte udhëzime për se si Trump mund të “merrte diçka që ai nuk duhet ta ketë”.