Kryeministri francez Bayrou përballet me votë mosbesimi pasi kaloi planin e buxhetit në parlament

Kryeministri francez François Bayrou e ‘realizoi’ planin e tij të buxhetit 2025 në parlament pa votim nga deputetët të hënën, duke përdorur një mjet të veçantë kushtetues të njohur si neni 49.3 për të miratuar projektligjin e vonuar prej kohësh.

Masa e hap qeverinë e tij të emëruar së fundmi ndaj rrezikut të një votimi mosbesimi të mërkurën.

Partia Socialiste (PS), pjesë e koalicionit të krahut të majtë Fronti i Ri Popullor (NFP), tha të hënën pasdite se ka zgjedhur të mos votojë kundër qeverisë së Bayrou.

Partia Socialiste tha në një deklaratë për shtyp se ata janë të gatshëm të paraqesin një mocion mosbesimi, vetëm “pasi të jetë miratuar buxheti”.

Megjithatë, Partia e majtë (LFI) njoftoi se do të parashtronte dy mocione mosbesimi: një kundër planit të buxhetit të shtetit dhe një të dytë kundër planit të buxhetit të sigurimeve shoqërore.

“Kjo qeveri jolegjitime duhet të bjerë”, tha LFI në llogarinë e saj zyrtare X, transmeton Telegrafi.

Partia Kombëtare e ekstremit të djathtë (RN) po heziton ende, duke u thënë gazetarëve se do të vendosin nëse do të votojnë kundër Bayrou deri të mërkurën.

Plani i diskutueshëm i buxhetit synon të reduktojë deficitin publik në rritje të vendit në 5.4 për qind këtë vit nga 6 e vlerësuar në 2024.

Për ta arritur këtë, qeveria e Bayrou synon të shkurtojë 30 miliardë euro dhe të rrisë taksat me 20 miliardë euro mbi superfitimet dhe familjet më të pasura.

Franca ka qenë nën presionin e BE-së për deficitin e saj, i cili është më shumë se dyfishi i përqindjes së autorizuar nga Brukseli.

Paraardhësi i Bayrou, Michel Barnier u rrëzua në dhjetor pasi e djathta ekstreme dhe NFP bashkuan forcat për të rrëzuar qeverinë.

Franca është përfshirë në një krizë të thellë politike, pasi presidenti francez Emmanuel Macron shpërndau në mënyrë tronditëse Asamblenë Kombëtare në qershor 2024 pasi partia e tij humbi nga e djathta ekstreme në zgjedhjet evropiane.

Megjithatë, loja e Macron rezultoi mbrapsht dhe zgjedhjet e parakohshme përfunduan me një dhomë të ulët të parlamentit të ndarë ashpër.

Sipas Kushtetutës franceze, Macron nuk mund të shpërndajë Asamblenë Kombëtare para verës së vitit 2025. /Telegrafi/