Kryeministri Kurti reagon për rastin e futbollistit Ilija Ivic: Lëreni Ilijan të luajë lirshëm kudo që ai zgjedh

Kryeministri i Kosovës, Albin Kurti ka reaguar pas rastit të 17 vjeçarit nga Graçanica, Ilija Ivic i cili prej më shumë se tri vitesh është pjesë e klubit Flamurtari ku këtë vit është angazhuar në juniorët dhe ka ndeshje edhe me ekipin e parë.

Kurti ka shkruar në Twitter se Ilija Ivic ka qenë subjekt i izolimit nga strukturat ilegale të Beogradit.

“Dje, një djalë 17-vjeçar në Graçanicë, Ilija Iviq, ishte subjekt i izolimit nga strukturat lokale të ndikuara nga Beogradi për shkak të dëshirës për të luajtur me shqiptarët. Marrëveshjet si të vetme nuk mund t’i rregullojnë problemet e dikujt me racizmin apo urrejtjen ndaj të tjerëve. Lëreni Ilijan të luajë lirshëm kudo që ai zgjedh”, ka shkruar Kurti.

Yesterday, a 17 year old boy in Gracanica Ilija Ivic, was subjected to segregation by Belgrade influenced local structures for wanting to play with Albanians.
Agreements alone cannot remedy one’s problems of racism and hatred of others.
Let Ilija play freely wherever he choses.

— Albin Kurti (@albinkurti) February 22, 2020

Ilija Ivic ka marrë ftesë nga përfaqësuesja U19 e Kosovës në futboll dhe si pasojë prindërit e të riut janë pushuar nga puna në komunën e Graçanicës.

Ivic në një intervistë për Telegrafin, kishte treguar se te Flamurtari është pritur shumë mirë nga shokët e ekipit dhe ndihet si në shtëpi, ndërsa ka marrë ftesë edhe nga Përfaqësuesja U19 e Kosovës.

Për këtë akt të serbëve ka reaguar ashpër edhe Komiteti Ekzekutiv i Federatës së Futbollit të Kosovës.

Nuk ka munguar as reagimi i ambasadorit gjerman në Kosovë.

Ndërkohë Telegrafi ka kontaktuar edhe Drejtorin Sportiv të Flamurtarit, Arbnor Morinën i cili ka njoftuar për rastin që i janë larguar prindërit nga puna.

“Ne sot u njoftuam nga djaloshi për rastin që i janë larguar dy prindërit nga puna. Menjëherë kemi kontaktuar me FFK-në për ta njoftuar me rastin”.

“Jemi shokuar si klub me këtë vendim të disa qarqeve, por që ne i qëndrojmë pranë futbollistit tanë”, ka thënë Morina për Telegrafin.

Ilija Ivic ka luajtur për të gjitha grupmoshat e Flamurtarit për të arritur në ekipin e parë. /Telegrafi/