Filmi aksion “The Old Guard 2” ka ngjallur polemika të forta mes kritikëve dhe shikuesve që nga publikimi më 2 korrik në Netflix.
Ndërsa recensentët nuk i kanë kursyer komentet negative, duke e cilësuar si “të mërzitshëm” dhe “të dështuar”, fansat janë treguar shumë më entuziastë dhe kanë mbushur rrjetet sociale me kërkesa për një pjesë të tretë.
Filmi ndjek mercenarët e pavdekshëm të udhëhequr nga Charlize Theron dhe Henry Golding, ndërkohë që antagonistja luhet nga Uma Thurman, shkruan DailyMail.
Edhe pse pjesa e parë e vitit 2020 u prit me nota pozitive për vizionin e saj dhe aksionin e kuruar, vazhdimi nuk ka arritur të njëjtin sukses kritik.
Në faqen Rotten Tomatoes, filmi i dytë cilësohet si një përpjekje e lodhur me histori të dobët dhe ekzekutim të mangët.
Megjithatë, suksesi te audienca është i padiskutueshëm: “The Old Guard 2” është ngjitur në vendin e parë të renditjes në Netflix, ndërsa filmi origjinal ka rikthyer popullaritetin duke u ngjitur në vendin e pestë.
Shikuesit në Reddit dhe platforma të tjera kanë shpërthyer në komente, ku shumë prej tyre kërkojnë me ngulm një vazhdim të tretë për të zgjidhur fundin e papritur të filmit të dytë. Disa, edhe pse të zhgënjyer, pranojnë se do ta shikonin gjithsesi çdo pjesë të ardhshme.
Në kontrast me këtë ekskluzivitet, një tjetër film aksion me protagoniste femër ka fituar zemrat e fansave: “The Wrath of Becky”, i cili u shtua së fundmi në bibliotekën e Netflix.
Me Lulu Wilson në rolin kryesor, si adoleshentja Becky që lufton kundër ekstremistëve, filmi është përshkruar si “John Wick femëror” dhe ka marrë vlerësime pozitive për intensitetin dhe stilin e veçantë të hakmarrjes.
Netflix ende nuk ka dhënë ndonjë konfirmim për “The Old Guard 3”, por presioni i fansave po rritet dita-ditës. Edhe pse kritikat janë të ashpra, popullariteti i filmit sugjeron se një vazhdim është më shumë çështje kohe sesa mundësi. /Telegrafi/
