Krasniqi: Do të jem ministri i parë nga Peja që do ta ‘shijojë’ rrugën e kryer Pejë-Prishtinë

Ministri i Administrimit të Pushtetit Lokal në Qeverinë e Republikës së Kosovës Elbert Krasniqi, ka deklaruar se do të jetë ministri i parë në detyrë nga Peja, i cili do të ‘shijojë’ udhëtimin e përditshëm për në punë në rrugën e kryer Pejë-Prishtinë.

Ministri Krasniqi tha se një tregim i gjatë e i ndërprerë, që edhe 22 vite pas luftës nuk mori epilog, me Qeverinë Kurti do kryhet.

“Tani është ndarë edhe një pjesë e mire e buxhetit nga Qeveria jonë, ministria përkatëse për aksin Zahaq-Kijevë dhe ky tregim në afat rekord do mbyllet. I bindur them se me Qeverinë Kurti, do jem ministri i parë në detyrë nga Peja, i cili do ta ‘shijoj’ udhëtimin e përditshëm për në punë në rrugën e kryer Pejë-Prishtinë”, tha në ‘RADIO 1’, ministri Krasniqi.

Ndryshe çështja e përfundimit të projektit të magjistrales Prishtinë-Pejë ishte premtim i të gjitha qeverive.

Tutje ministri Krasniqi ka folur edhe për projekte tjera të Qeverisë Kurti përderisa ka sqaruar rëndësinë e aplikimit të komuniteteve për policë të Kosovës në veri të vendit si dhe aplikimin e të njëjtëve për t’iu bashkuar Ushtrisë së Kosovës.

“Në rastin e thirrjes për aplikim të komuniteteve për policë në veri të shtetit është moment me rëndësi institucionale e shtetërore , ndaj nuk duhet që askush të bëjë politikë duke u munduar ta godas Elbert Krasniqin apo Albin Kurtin politikisht. Inkuadrimi i  komuniteteve tjera është strategji me interes shtetëror për shkak të specifikave atje. Po ashtu edhe inkuadrimi i komuniteteve në ushtri ka rëndësi për jetën e secilit nga ne.

Në frontin tjetër unë si ministër, ose si pjesë e kabinetit qeveritar punoj çdo ditë për avancimin e komuniteteve tona në shoqëri, konkretisht ndalemi tek komuniteti RAE. Mos harroni veç një fakt po e qes, 500 bursa janë ndarë për shkollim. Kjo nuk na kënaqë, por jemi çdo ditë në punë. Edhe në detyrat ministrore edhe tek çështjet e komuniteteve për çfarë unë kam interesim, kryeministri Kurti është bashkëpunëtorë i jashtëzakonshëm”, citohet të ketë thënë Krasniqi.

Tutje ministri Elbert Krasniqi është ndalur edhe tek çështjet brenda partiake, si kryetar i IRDK-së ka shprehur mirënjohjet më të mëdha për themeluesit e këtij subjekti.

“Jam i nderuar që vij nga një shkollë politike me bazament. Ibish Bajrami, Ymer Aliu, Xhevdet Neziraj, Emin Sefa janë emra që i njeh krejt Rrafshi i Dukagjinit për ndershmëri politike e si njerëz stoik. Jam vazhdimësi e tyre”, tha Krasniqi.