Ebu Hafs Al Albani është nofka luftarake e Genc S. i arrestuar të mërkurën nga Policia e Kosovës. Pretendon se është ndjekës i udhës së Al-Qaedes në Ballkan dhe paralajmëron ardhjen e saj së shpejti. Al Albani ka qenë një kohë në Siri si luftëtar nga Kosova së bashku me shqiptarë të tjerë. Është kthyer prej kohësh në Kosovë. Kthimi këtu, e ka bërë të dyshimtë.

Është futur në përgjime një kohë të gjatë derisa të mërkurën është arrestuar. Të premten, i është caktuar masa e paraburgimit prej 30 ditësh, shkruan “Koha Ditore”.

Policia ka arrestuar edhe shokë të tij në aksionin që është zhvilluar në Prishtinë dhe në Gjilan e ka zbuluar armë dhe një sasi eksplozivi të lidhur me telefona celularë të gatshëm për shpërthim.

Valon Sh., Musli H, Ardian M. dhe Nuredin S dyshohet se janë arrestuar pas hetimeve që janë zhvilluar kundër tyre, rreth veprimeve që kanë të bëjnë me Sirinë, transmeton “Koha”.

Ndërsa Bekim M. dyshohet vetëm për sulm të rëndë fizik të ushtruar ndaj dy shtetasve amerikan, pjesëtar të një organizate të krishterë që në Kosovë shpërndanin fletushka fetare. Arrestimet u kryen në kuadër të operacionit policor të zhvilluar ditë më parë. /Telegrafi/