Konjufca ngushëllon familjen Thaçi dhe punonjësit e Policisë

Kryetari i Kuvendit të Republikës së Kosovës, Glauk Konjufca, ka ngushëlluar familjen e policit të rënë në krye të detyrës, Sami Thaqit dhe të gjithë punonjësit e Policisë së Kosovës, për humbjen e familjarit, përkatësisht kolegut të tyre.

“Lajmi për rënien në krye të detyrës të pjesëtarit të Policisë së Kosovës, Sami Thaqi, është i hidhur e pikëllues. Dëshiroj të shpreh ngushëllimet e mia, personale e njerëzore por edhe në emër të institucionit që përfaqësoj. Në këto momente bashkëndiejmë me familjarët e të ndjerit Sami Thaqit dhe me gjithë punonjësit e Policisë të Kosovës që humbën kolegun e tyre. Po ashtu, shpresoj që të jenë jashtë rreziku e të përmirësohen shpejt policët e tjerë të plagosur, si dhe një fëmijë që po ashtu mora vesh se është lënduar gjatë ngjarjes”, thuhet në telegramin e Konjfucës.

Konjfuca ka theksuar se organet e sigurisë së Kosovës kanë dëshmuar në vazhdimësi se janë të gatshme të luftojnë krimin në vend, dhe rasti heroik i Sami Thaçit është një tjetër dëshmi se policët tanë janë në krye të detyrës, pa u trembur.

Lexo po ashtu Varroset me nderime të larta polici Sami Thaqi

“Është koha që edhe shteti dhe institucionet tona të vihen në krye të detyrës dhe të japin ndihmën dhe mbrojtjen e nevojshme që të luftohen të gjitha veprimtaritë e dëmshme për shoqërinë e vendin, që nga krimi i rëndomtë e deri te korrupsioni i niveleve të larta, e që të vendoset më në fund drejtësia e dëshiruar nga populli”, ka pohuar Konjfuca.

Sami Thaqi ka ndërruar jetë të martën gjatë një operacioni antidrogë në Zhur të Prizrenit. Dita e enjte është shpallur ditë zie në nderim të jetës dhe veprës së tij./Telegrafi/