Komuna e Gjilanit nderon më të mirët e vitit në kulturë, rini dhe sport

Drejtoria për Kulturë, Rini dhe Sport e Komunës së Gjilanit ka shpallur më të mirët e vitit në kulturë, rini dhe sport, duke vlerësuar individë dhe organizata që kanë kontribuar në zhvillimin dhe promovimin e këtyre fushave.

Me këtë rast, Kryetari i Komunës, Alban Hyseni, e cilësoi këtë ngjarje si një moment të veçantë, duke falënderuar të gjithë ata që kanë ndihmuar në pasurimin e qytetit me arritjet e tyre.

“Një falënderim i madh për të gjithë ata që kontribuojnë për të bërë Gjilanin një qytet më të pasur në kulturë, rini dhe sport,” tha Hyseni.

Ndërkohë, drejtori për Kulturë, Rini dhe Sport, Kushtrim Zeqiri, theksoi se ky vit ka qenë i mbushur me aktivitete dhe arritje që reflektojnë vitalitetin e këtyre sektorëve.

“Këto arritje janë dëshmi e shpirtit të komunitetit tonë dhe na japin arsye të jemi krenarë për atë që kemi realizuar së bashku,” u shpreh ai.

Për teatrin dhe filmin u dalluan Aurita Agushi si aktorja më e mirë e vitit, Alban Shahiqi si aktori më i mirë, dhe Shkëlzen Berisha për regjinë e shfaqjes “Togeri nga Inimshori”. Për artet pamore, artisti i vitit u shpall Petrit Maliqi, ndërsa Fadil Kajtazi mori çmimin për shkrimtarin e vitit.

Në muzikë, çmimet shkuan për Qazim Kryeziun si artisti më i mirë i muzikës popullore, Elona Sadiku si artistja më e mirë e muzikës moderne, dhe Ylberina Avdyli për muzikën klasike. Prezantimet ndërkombëtare u vlerësuan me çmime për artistët Fatjona Maliqi, Anila Aliu dhe grupin Artin Rising Stars.

Në sport, FC Drita u veçua për arritjet e saj historike, duke u shpallur Kampione Vjeshtore dhe duke arritur fazën Play-Off të Konferencë Ligës, një sukses që e renditi klubin në krye të rank-listës së UEFA-s për klubet mbarëkombëtare. Ndër arritjet individuale spikatën emrat e sportistëve si Faton Maloku, Donat Syla dhe Aridon Bllaca, ndërsa në kategorinë e trajnerëve dhe pedagogëve u dallua Nazim Halili dhe Blerim Shala.

Figura të tjera u nderuan për kontributet e tyre të jashtëzakonshme në fusha të ndryshme, duke përfshirë këtu edhe mirënjohjet post-mortum për individë që kanë lënë gjurmë të pashlyeshme në kulturë dhe sport, si Fidan Arifi, Tahir Murati, dhe Ergin Sherifi.

Kjo ngjarje shënon një tjetër hap drejt fuqizimit të kulturës, rinisë dhe sportit në Gjilan, duke vlerësuar jo vetëm të arriturat e vitit që po përmbyllet, por edhe duke krijuar një platformë për motivimin dhe angazhimin e mëtejshëm. /Telegrafi/