Kompanitë mediatike Vice dhe Motherboard paraqesin kërkesën për falimentim

Kompania që qëndron pas faqeve të internetit Vice dhe Motherboard ka paraqitur kërkesë falimentimi në Shtetet e Bashkuara të Amerikës dhe është vendosur t’i shitet një grupi huadhënësish të saj.

Vice Media Group – i cili dikur vlerësohej në 5.7 miliardë dollarë – tashmë mund të shitet për 225 milionë dollarë, duke thënë se do të vazhdojë të funksionojë gjatë procesit të falimentimit.

E lansuar në vitin 1994 si një revistë e quajtur Voice of Montreal nga Shane Smith, Gavin McInnes dhe Suroosh Alvi, Vice aktualisht operon në më shumë se 30 vende.

Investitorët e Vice Media Group përfshijnë Fortress Investment Group, Monroe Capital dhe Soros Fund Management.

Huadhënësit kanë miratuar 20 milionë dollarë financim për të mbajtur Vice Media të kalojë procesin e falimentimit. Gjatë kësaj kohe, firmat e tjera mund të paraqesin oferta “më të larta ose më të mira” për kompaninë mediatike. Nëse këto oferta nuk janë të suksesshme, huadhënësit e Vice Media do ta blejnë për 225 milionë dollarë.

Të ardhurat e kompanisë kanë qenë të paqëndrueshme për disa vite dhe ajo gjithashtu ka luftuar për të nxjerrë një fitim. Muajin e kaluar, kompania njoftoi pushime të personelit nga puna pasi programi i saj kryesor televiziv u mbyll. /Telegrafi/