Komisioni Evropian propozon pezullimin e plotë të marrëveshjes për lehtësimin e dhënies së vizave për rusët

Komisioni Evropian ka propozuar pezullimin e plotë të marrëveshjes për lëshimin e lehtë të vizave me Rusinë, që do të thotë se qytetarët rusë do të paguajnë më shumë dhe procedura e dhënies së vizave do të zgjasë më shumë.

Propozimi erdhi pasi ministrat e jashtëm të vendeve anëtare arritën një marrëveshje politike mbi të javën e kaluar në Pragë.

Komisioni publikoi gjithashtu një propozim për mosnjohjen e pasaportave ruse të lëshuara në territoret e okupuara të Ukrainës.

“Për sa kohë që agresioni rus kundër një vendi që është kandidat për anëtarësim në BE vazhdon, qytetarët rusë nuk mund të kenë lehtësi për të udhëtuar në Evropë”, tha nënkryetari i Komisionit për Zbatimin e Mënyrës Evropiane të Jetës, Margaritis Shihinas, raporton skynews.

Ai shtoi se politika e vizave e BE-së është “një shenjë besimi, të cilën Rusia e ka shkatërruar plotësisht me një luftë agresive të paprovokuar dhe të padrejtë kundër Ukrainës”.

Në të ardhmen, rusët do të paguajnë 80 euro për viza për të hyrë në BE, në vend të 35 eurove aktuale. Afati për lëshimin e vizave do të rritet nga 10 në 15 ditë dhe mund të zgjatet deri në maksimum 45 ditë kur kërkohet një kontroll më i detajuar i aplikantit për vizë.

Lëshimi i vizave që mundësojnë hyrjen e shumëfishtë në BE do të jetë i kufizuar dhe qytetarët rusë do të duhet të paraqesin më shumë dokumente në aplikimet e tyre për vizë sesa është tani.

Marrëveshja për lehtësimin e vizave me Rusinë hyri në fuqi në prill të vitit 2007. Më 25 shkurt, një ditë pas fillimit të pushtimit rus të Ukrainës, BE-ja e pezulloi pjesërisht atë për biznesmenët rusë.

Propozimi për pezullimin e marrëveshjes duhet të miratohet nga Këshilli i BE-së. /Telegrafi/