Kjo është kontrata multimilionëshe që Manchester City i ka bërë Messit dhe që po e tundon argjentinasin të transferohet në Angli

Lionel Messi mund të largohet nga Barcelona gjatë afatit kalimtar veror.

E ardhmja e argjentinasit është në pikëpyetje në Camp Nou, pasi vet Messi ka kërkuar nga klubi ta lejojnë largimin e tij.

Kjo ka bërë që shumë skuadra të mëdha të futën në garë për gjeniun argjentinas, por në përparësi duket Manchester City.

Trajneri Pep Guardiola si dhe bashkëkombësi i tij Sergio Aguero janë dy faktorë të rëndësishëm që mund ta bindin Messin t’i bashkohet Cityt.

Por një tjetër gjë që po luan rol të madh në vendimin e argjentinasit është edhe kontrata afatgjate që City është gati t’ia ofrojë atij.

Messi tani është në moshën 33-vjeçare, ndërsa Manchester City po përgatitë një kontratë afatgjate prej pesë viteve me të.

City është gati që ta mbajë në Ligën Premier lojtarin më të mirë në botë për tri vitet e ardhshme, ndërsa dy vitet e fundit me pagën e njëjtë argjentinasi të luaj në MLS me ekipin tjetër New York City që menaxhohet nga kompania City Football Group.

Mediat në Spanjë dhe Angli kanë raportuar se kjo kontratë afatgjate e ka tunduar Messin i cili do të mund të ishte pjesë e futbollit deri në moshën 38 vjeçare.

Gjithsesi përveç që është një kontratë afatgjate,City janë gati që ta bëjnë argjentinasin lojtarin më të paguar në botë.

Aktualisht Messi merr nga Barcelona një pagë vjetore prej 29 milionë eurove në sezon, duke mbetur mbrapa yjeve tjerë si Cristiano Ronaldo me 31 milionë dhe Neymar me 36,8 milionë euro pagë vjetore.

City është gati që ta bëjë argjentinasin futbollistin më të paguar të të gjitha kohërave, me një pagë prej rreth 40 milionë eurove në stinor.

Messi është pro një ribashkimi me Pep Guardiolën, por tani Manchester City duhet ta bind Barcelonën me një ofertë të mirë që ta lejojnë largimin e argjentinasit. /Telegrafi/