Këshilltari i presidentit Joe Biden për siguri kombëtare: Nëse Vladimir Putin dëshiron të shohë rrjedhjen e gazit në ‘Nord Stream II’, mos ta merr përsipër rrezikun e pushtimit të Ukrainës

Nëse presidenti Vladimir Putin dëshiron të shohë rrjedhjen e gazit përmes tubacionit “Nord Stream II”, atëherë ai nuk duhet ta merr përsipër rrezikun e pushtimit të Ukrainës.

Këto komente i ka bërë këshilltari për siguri kombëtare i presidentit Joe Biden, Jake Sullivan në një konferencë për medie në Shtëpi të Bardhë.

“Kur bëhet fjalë për ‘Nord Stream II’, fakti është se gazi aktualisht nuk po rrjedh përmes këtij gazsjellësi, që do të thotë se ai nuk po funksionon dhe se nuk është levë për Putinin. Në të vërtetë, është një levë për Perëndimin, sepse nëse ai dëshiron të shohë rrjedhjen e gazit përmes atij tubacioni, ai mund të mos dëshirojë të marrë përsipër rrezikun e pushtimit të Ukrainës”, është shprehur Sullivan.

Tune in for a briefing with Press Secretary Jen Psaki. https://t.co/6qKeEfx3fe

— The White House (@WhiteHouse) December 7, 2021

Ai tregon se është në bisedime me qeverinë e re gjermane që të bllokoj këtë projekt, si pjesë e masave për të penguar Putinin nga aksioni i mundshëm ushtarak ndaj Ukrainës.

“Ne kemi pasur diskutime intensive si me qeverinë gjermane në largim, ashtu edhe me qeverinë në ardhje për çështjen e ‘Nord Stream II’ në kontekstin e një pushtimi të mundshëm [të Ukrainës nga Rusia]”, ka shtuar ai.

“Tema e ardhshme e ‘Nord Stream II’, në kontekstin e një pushtimi të Ukrainës nga Rusia gjatë javëve të ardhshme, është një temë me prioritet të madh”, ka përfunduar Sullivan.

Po ashtu, këshilltari për siguri, pas takimit virtual të presidentit Biden me atë rus Putin, ka paralajmëruar Rusinë se, “gjërat që nuk i kemi bërë në vitin 2014 [pushtimi i Krimesë nga Rusia], jemi të përgatitur t’i bëjmë tani”.

Lexo po ashtu Shtëpia e Bardhë, Putinit: Gjërat që nuk i kemi bërë në 2014, jemi të përgatitur t'i bëjmë tani

Zyrtarët ukrainas dhe perëndimorë janë të shqetësuar se shtimi i trupave ruse pranë Ukrainës, mund të sinjalizojë planet e Moskës për një sulm ndaj vendit fqinj.

Në fillim të këtij viti, rritja e shkeljeve të armëpushimit në lindje dhe një përqendrim i trupave ruse pranë Ukrainës nxitën frikën e luftës. /Telegrafi/