I kërkonin 3,000 euro për të mos i publikuar lidhjen intime, arrestohen tre persona në Elbasan

Tre persona janë vënë në pranga nga policia e Elbasanit pasi akuzohen se shantazhuan një person nëpërmjet rrjetit social “Instagram” që të mos i publikonin lidhjen intime.

Prokuroria e Elbasanit ka bërë të ditur se ndaj tre të arrestuarve tashmë rëndojnë akuzat për veprën penale të “Shtrëngimi me anë të kanosjes ose dhunës për dhënien e pasurisë”.

“Në datë 11.10.2022 rreth orës 10:45 pranë “Rita Park” është realizuar takimi midis viktimës E. K., dhe H.P, ku viktima i ka dorëzuar 3,000 Euro shtetasit H.P. Ky person ka ardhur me mjetin e tij Taxi me targa EL 6…A. Ky veprim është dokumentuar edhe me raportet e shërbimit nga Seksioni Operacional i DVP Elbasan”, thuhet në njoftimin e policisë.

Nga ana e prokurorit të çështjes është vendosur në përgjim numri telefonik, si dhe numrat e tjerë të cilat rezultuan në dinamikë.

“Pas dorëzimit, taksia është nisur për në Tiranë, e ndjekur nga forcat e policisë, dhe pasi ka pikasur policinë ka ndërruar rrugë. Më pas, është bërë nga policia gjyqësore arrestimi i shtetasve H.P., S.H. dhe Xh.Gj, dhe në gjendje të lirë është ndjekur shtetasja nën hetim A.H.”, njofton prokuroria e Elbasanit”, ka shtuar policia. /Telegrafi/