KDI iu shkruan deputetëve të Kuvendit, kërkon seancë të jashtëzakonshme për zhvillimet në veri

Instituti Demokratik i Kosovës (KDI), pas protestave dhe dorëheqjeve të kryetarëve të komunave me shumicë serbe në veri, kërkon mbajtjen e një seance të jashtëzakonshme të Kuvendit të Kosovës, në mënyrë që të ketë një qasje të koordinuar konsensuale të skenës politike dhe institucionale për të parandaluar krijimin e vakumit institucional.

Në një letër dërguar deputetëve të Kuvendit të Kosovës, KDI kërkon nga ligjvënësit kosovarë t’i kontribuojnë situatës aktuale me rekomandime dhe veprime konkrete për të adresuar këto zhvillime dhe për të rikthyer normalitetin e jetës qytetare dhe asaj institucionale.

“Duke ditur rolin dhe përgjegjësitë e deputetit dhe grupit parlamentar, ne përmes kësaj letre direke ju bëjmë thirrje që të angazhoheni qoftë në kapacitet individual apo grupimit parlamentar për të thirrur seancën e jashtëzakonshme”, thuhet në letër.

Ndryshe, serbët sot protestuan në Mitrovicën e Veriut dhe katër kryetar të komunave me shumicë serbe dhanë dorëheqje, duke paralajmëruar shkëputje të komunikimit me institucionet e Kosovës në shenjë revolte ndaj vendimit për ngritjen e taksës 100 për qind ndaj mallrave serbe që hyjnë në Kosovë.

Letra e plotë e KDI-së:

Instituti Demokratik i Kosovës (KDI) po përcjellë me vëmendje zhvillimet në pjesën veriore të Republikës së Kosovës si protestat qytetare dhe dorëheqjen e katër kryetarëve të komunave me shumicë Serbe, paralajmërimet për bojkot të institucioneve dhe shkëputjen e marrëdhënieve dhe komunikimit zyrtar me institucione të nivelit qendror, etj. KDI vlerëson se këto janë mjaftueshëm zhvillime të cilat kërkojnë vëmendjen e institucioneve të Kosovës, në këtë rast Kuvendit.

Në bazë në Nenit 38 të Rregullores së Kuvendit lidhur me mbledhjet e jashtëzakonshme për shqyrtimin e çështjeve të ngutshme, KDI vlerëson nevojën që Kuvendi i Kosovës të ftoj një seancë të jashtëzakonshme për të diskutuar rreth zhvillimeve të fundit në vend. Kjo seancë e jashtëzakonshme duhet të shërbej nevojën për një qasje të koordinuar konsensuale të skenës politike dhe institucionale për të parandaluar krijimin e vakumit institucional.

I/E nderuar deputet/e, ne besojmë në vullnetin dhe angazhimin tuaj që t’i kontribuoni situatës aktuale me rekomandime dhe veprime konkrete ndaj institucioneve të vendit për të adresuar këto zhvillime dhe për të rikthyer normalitetin e jetës qytetare dhe asaj institucionale.

Prandaj duke ditur rolin dhe përgjegjësitë e deputetit dhe grupit parlamentarë, ne përmes kësaj letre direke ju bëjmë thirrje që të angazhoheni qoftë në kapacitet individual apo grupimit parlamentar për të thirrur seancën e jashtëzakonshme.

Ju falënderojmë për gatishmërinë tuaj për bashkëpunimin, me bindjen që sugjerimi ynë do të merret parasysh. /Telegrafi/