KB Rahoveci kërkon hetim nga FBK-ja për akuzat e tifozëve të saj “Vreshtarëve” ndaj lojtarëve për manipulim të ndeshjes

Klubi i basketbollit, Rahoveci, ka reaguar pas akuzave të tifo-grupit “Vreshtarët” se dy lojtarë të këtij klubi bashkë me trajnerin e Ponte Prizrenit kanë manipuluar ndeshjen me prizrenasit në rrethin e parë të play-offit.

Në një deklaratë publike, KB Rahoveci ka thënë se i ka marrë me shqetësim diskutimet e fundit dhe se ka biseduar me basketbollistët në fjalë. Klubi ka njoftuar se ka kërkuar nga Federata e Basketbollit të nisë procedura hetimore për rastin.

“Për këtë arsye KB Rahoveci zyrtarisht ka kërkuar nga FBK që të nis procedura hetimore në këtë rast dhe do të kërkoi edhe nga instancat tjera hetimore që këtë çështje ta qojnë deri në fund, sepse vlerësojmë se gjitha reagimet duhet sqarohen. Po ashtu për këtë pikë kemi diskutuar edhe me drejtuesit e Ultras Vreshtarët dhe janë njoftuar lidhur me zhvillimet. Minnis dhe Fred mohojnë kategorikisht të kenë qenë të përfshirë në këtë zhvillim, ndërsa KB Rahoveci do të presë veprimet konkrete të instancave përkatëse para se të marrë çdo vendim për të njëjtit”, thuhet në deklaratën e klubit.

Klubi më tej ka thënë se si bord asnjëherë s’ka menduar se dikush nga ekipi mund të punojë kundër tyre.

“Ne në kushte të jashtëzakonshme kemi vepruar katër vite, vetëm që ta sjellim klubin në këtë pikë, ku sot ka shtëpi është skuadra me e organizuar dhe që e njëjta gëzon edhe respekt ndërkombëtar. Përpjekjet e secilit për të shkatërruar këtë projekt ju garantojmë që do të dështojnë, prandaj nevojitet vazhdimi i përkrahjes dhe besimi në këtë skuadër. Parimet bazë të funksionimit tonë kanë qen çdo herë profesionale, që basketbollistët të kenë kushtet që duhet, zbatimin e kontratës e deri te ndjenja e të qenurit krenarë për këtë klub secili në Rahovec. Të nderuar, ne do të vazhdojmë të ju bëjmë krenarë sepse baza është fortë dhe askush nuk mund të jetë mbi klubin. Bordi vlerson dhe kërkon nga të gjithë që të keni durim e mirëkuptim derisa këto procese të kryhen nga instancat përkatëse hetimore. Në këtë momente duhet të fokusohemi në ndeshjen e dytë ndaj Ponte Prizrenit më të cilën duhet të tentojmë ta shpëtojmë sezonin”, thuhet në njoftim.