Një paraqitje që dëshmon se thjeshtësia e kombinuar me elegancën është gjithmonë në modë
Aktorja e njohur Katie Holmes vendosi të marrë një pauzë nga angazhimet e saj të shumta dhe të shijojë atmosferën e një prej turneve më prestigjioze të tenisit në botë - US Open.
Nuk është sekret që shumë fytyra publike dhe yje të Hollywood-it e adhurojnë tenisin, prandaj tribunat e kësaj ngjarje janë shpesh të mbushura me personalitete të njohura nga bota e filmit, muzikës dhe modës.
Holmes u fotografua nga mediat ndërkombëtare në mesin e spektatorëve, duke tërhequr vëmendjen me kombinimin e saj unik të veshjes.
Për këtë paraqitje, ajo kishte zgjedhur një fustan me kuadrate të markës “Silk Laundry”, i cili i dha një pamje të freskët dhe plot sharmë.
Pamjen e kishte kompletuar me një xhaketë lëkure, syze dielli të markës A.P.C. Brown Moe, si dhe baletanka klasike “Schutz”, transmeton Telegrafi.
Në duar mbante një çantë të vogël “Marni”, e cila sipas revistave të modës, do të shndërrohet në një nga aksesorët më të kërkuar të sezonit që vjen.
Ky kombinim krijoi një stil elegant të përditshëm, një ekuilibër perfekt mes thjeshtësisë dhe elegancës, tipar që e ka karakterizuar Holmes edhe në paraqitjet e tjera të saj publike. Kritikat e modës theksojnë se ajo po e kthen çantën mini “Marni” në simbolin e ri të trendeve për vitin 2025.
Revista “Vogue” e ka cilësuar këtë paraqitje si një shembull të thjeshtë por të fuqishëm të asaj se si aksesorët e zgjedhur me kujdes mund të transformojnë një veshje të zakonshme në një deklaratë mode.
/Telegrafi/
