Kapen me 60 kilogram kanabis, arrestohen dy të rinj në Tiranë, shpallet në kërkim bashkëpunëtori

Policia ka arrestuar dy persona dhe ka shpallur në kërkim një të tretë, të akuzuar prodhim dhe shitje të lëndëve narkotike. Policia sekuestroi 6 thasë me kanabis, në total 60 kg.

Në pranga ranë K. U., 35 vjeç, banues në Krujë dhe A. R., 26 vjeç, banues në Mat. Ndërsa në kërkim u shpall një 28-vjeçar, i dyshuar bashkëpunëtor në këtë veprimtari kriminale.

Njëri prej të arrestuarve po transportonte lëndën narkotike me makinë, ndërsa tjetri monitoronte rrugën ku do kalonte shoku.

Bazuar në informacionet e siguruara nga inteligjenca policore se këta shtetas po transportonin një sasi lënde narkotike, shërbimet e Policisë kanë ndaluar në Luz, Fushë Krujë, automjetet me të cilat po qarkullonin këta shtetas.

Gjatë kontrollit të ushtruar në automjetin me drejtues shtetasin K. U., në pjesën e pasme, shërbimet e Policisë kanë gjetur 6 thasë me lëndë të dyshuar cannabis sativa, me peshë totale 60 kilogramë. Automjeti tjetër drejtohej nga shtetasi A. R., i cili kontrollonte rrugën dhe njoftonte shtetasin K. U., nëse kishte prezencë të Policisë.

Në vijim të veprimeve, u shpall në kërkim shtetasi S. D., 28 vjeç, i dyshuar si bashkëpunëtor në këtë veprimtari kriminale.

Lënda narkotike u sekuestrua në cilësinë e provës materiale, bashkë me 2 automjetet, 2 celularë dhe një shumë parash.

Materialet procedurale i kaluan Prokurorisë, për veprime të mëtejshme, për veprën penale “Prodhimi dhe shitja e narkotikëve”, kryer në bashkëpunim. /Telegrafi/