Kallas kritikon Scholzin për Ukrainën

Pak ditë pasi mori drejtimin e politikës së jashtme në Bashkimin Evropian, Kaja Kallas kritikoi kancelarin gjerman, Olaf Scholz, për qëndrimin e tij ndaj Ukrainës.

“Ukraina ka nevojë për më shumë armë me rreze të gjatë dhe më shumë municione, në mënyrë që të forcohet përballë negociatave. Sa më e fuqishme të jetë Ukraina ushtarakisht, aq më e fuqishme do të jetë edhe në tryezën e bisedimeve. Ky duhet të jetë prioriteti ynë,” tha Kallas në një intervistë për gazetën gjermane Süddeutsche Zeitung.

Megjithatë, kancelari Scholz deri më tani ka refuzuar dërgimin e raketave me rreze të gjatë Taurus në Ukrainë, sipas raportimit të t-online.

Lexo po ashtu Scholz i tregoi Zelenskyt se çka bisedoi dy javë më parë me Putinin

Përveç kësaj, Kallas kritikoi edhe hezitimin e Scholz për të artikuluar qartë qëllimin e një fitoreje të Ukrainës në luftën mbrojtëse kundër Rusisë.

“Nuk e kuptoj pse ka frikë nga përdorimi i këtyre termave. Pyetjet janë të thjeshta: A dëshironi që rregullat ndërkombëtare të respektohen? A dëshironi një botë ku e drejta triumfon mbi forcën? A mbështesni parimet e sovranitetit dhe integritetit territorial, siç përcaktohen në Kartën e Kombeve të Bashkuara? Nëse përgjigjja për të gjitha këto është ‘po’, atëherë duhet të dëshironi fitoren e Ukrainës,” tha ajo.

Kallas gjithashtu mbështeti anëtarësimin e Ukrainës në NATO, duke theksuar se kjo do të ishte garancia më e mirë për sigurinë e vendit përballë Rusisë. “Unë besoj se anëtarësimi në NATO është garancia më efektive e sigurisë,” deklaroi ajo.

Nga ana tjetër, Scholz, ashtu si disa udhëheqës të tjerë të vendeve anëtare të NATO-s, mbetet skeptik për mundësinë e pranimit të Ukrainës në aleancë në një të ardhme të afërt. /Telegrafi/