Jack Wilshere publikon fotografi pas operacionit, ai nuk mund të luajë këtë sezon

Jack Wilshere është zotuar se do të kthehet pas ndërhyrjes kirurgjike për të korrigjuar një hernie abdominale, si pasojë e të cilës nuk do të mund të luajë deri në fund të sezonit.

Mesfushori i West Ham Unitedit i ka publikuar në InstaStory disa fotografi, ku shfaqet në spital pas operacionit.

28-vjeçari ka startuar vetëm në dy ndeshje në Ligën Premier këtë sezon për shkak se problemet me lëndime kanë vazhduar t’ia kufizojnë lojën.

Ish-futbollisti i Arsenalit tash përballet me një tjetër mungesë afatgjatë, mirëpo është i vendosur që të kthehet më i fortë.

“Qeshni me mua, por mos harroni se jam një qenie njerëzore që dëshiron t’i mbathë këpucët dhe të luajë futboll. Është gjëja e vetme që e dua dhe trupi im aktualisht nuk ma lejon. Kjo më dhemb shumë, por do të kthehem”, shkruan në postimin e tij.

Wilshere iu bashkua West Hamit në verën e vitit 2018 si lojtar i lirë, ndërsa që atëherë ka regjistruar vetëm 18 paraqitje.

Lojtari që paguhet 100.000 funte (120.000 euro) në javë, në sezonin e kaluar pati problem me nyjën e këmbës, ndërsa këtë sezon gjërat janë përkeqësuar akoma më shumë. /Telegrafi/