BE-ja paralajmëron kundër hapjes së llogarive në rubla për pagesat e gazit

Komisioni Evropian tha se hapja e llogarive në rubla në një bankë ruse, me qëllim që të bëhen pagesat për gaz, shkel sanksionet e bllokut kundër Moskës, teksa Brukseli publikoi udhëzimet e reja lidhur me atë se si kompanitë munden që ligjërisht të vazhdojnë të blejnë karburante ruse.

Shtetet dhe kompanitë për javë të tëra kanë kërkuar qartësi se si mund të vazhdojnë blerjen e energjisë ruse, pasi Moska në fund të marsit kërkoi që blerësit e huaj të bëjnë pagesa me rubla për gazin rus ose do të rrezikonin që të shkëputeshin nga furnizimet.

Në udhëzuesin e përditësuar që BE-ja ka publikuar së fundmi, Komisioni Evropian konfirmoi këshillën e mëhershme se sanksionet e BE-së nuk ndalojnë kompanitë që të hapin llogari në banka ruse.

Aty u tha se kompanitë mund të paguajnë për gazin rus, për aq kohë sa këto pagesa i bëjnë me valutën që është përcaktuar në kontratat ekzistuese.

Pothuajse të gjitha kontratat për furnizim që kompanitë nga BE-ja kanë me gjigantin rus të gazit Gazprom, janë në euro ose dollarë.

Por, një zëdhënës i Komisionit Evropian tha të martën se hapja e llogarive në rubla në bankën ruse Gazprombank, do të ishte shkelje e regjimit të sanksioneve të bllokut evropian.

“Kjo shkon përtej indikacioneve që ne i kemi dhënë për shtetet anëtare se çfarë mund të bëjnë nën regjimin e sanksioneve”, tha ky zëdhënës për gazetarët.

Dekreti i presidentit Vladimir Putin thotë se transaksionet mund të kryhen vetëm pasi valutat e huaja të jenë këmbyer në rubla dhe kompanitë duhet të hapin dy llogari në bankën ruse, një në valutë të huaj dhe tjetrën në rubla.

Rusia ka ndërprerë furnizimet me gaz për Bullgarinë dhe Poloninë muajin e kaluar, pasi këto dy shtete refuzuan që të paguanin gazin me rubla. /Telegrafi/