Istogu e heqë kushtëzimin e mbeturinave për regjistrim të automjeteve

Komuna e Istogut e ka hequr kushtëzimin për pagesë të mbeturinave me rastin e regjistrimit të automjeteve, kusht që ka qenë ky deri para pak ditësh.

Lajmin e ka bërë të ditur nënkryetari i Komunës, Lulzim Blakaj, i cili ka thënë për KosovaPress se ky vendim është larguar edhe pse sipas tij nuk ka pasur vërejtje nga qytetarët e komunës.

“Është heq vendimi i mëhershëm që ka qenë për kushtëzimin për regjistrimin e automjeteve, do të thotë përveç taksës për regjistrimin e automjeteve, kjo taksa komunale, ka qenë e kushtëzuar me pagesën e mbledhjes së mbeturinave”, ka deklaruar ai.

Megjithatë, Blakaj ka shtuar se nga kontaktet me Giz-in gjerman, këta të fundit nuk e kanë pritur mirë një vendim të tillë duke propozuar që kompania e pastrimit të gjej mënyra alternative për grumbullimin e mjeteve për punën që e kryen.

Javë më parë, KosovaPress-i, kishte raportuar se Komuna i kushtëzon qytetarët për regjistrimin e automjeteve me pagesën e shërbimit të mbeturinave, gjë që ka qenë në kundërshtim me ligjet në fuqi. /Telegrafi/