Ishte ndalur për të pushuar, mërgimtarit në Serbi ia prishin veturën dhe i kërkojnë 2,000 euro për t’ia rregulluar

Bashkatdhetarët tanë të cilët kanë qëndruar për festat e fundvitit në Kosovë, janë duke u maltretuar jashtë mase gjatë kalimit në pikën kufitare me Serbinë.

Përkundër që po presin me orë të tëra në pikën kufitare në Merdare, atyre po iu krijohen probleme edhe gjatë rrugës.

Vetëm të shtunën janë raportuar disa raste që mërgimtarëve iu janë shpuar gomat e veturave.

Por jo vetëm kaq, një bashkatdhetar që jeton në Gjermani ka rrëfyer tmerrin që ka përjetuar gjatë kalimit nëpër Serbi.

F.S., nga Prishtina, ka thënë për Telegrafin se pas kalimit të pikës kufitare ai ishte ndalur për të pushuar në një vend ( pompë derivatesh), dhe disa serbë ia kishin prishur veturën duke bërë që të mos ndizej më.

“Pas një orë e gjysmë vozitje, jam ndalë me pushu në një pompë karburanti. Kisha flejt pak në kerr, edhe xhamat ishin avullu, e dheza kerrin me e nxeh pak se dojsha me vazhdu rrugë, por nuk u dhez. Kur dola jashtë disa serbë aty më thanë mos e provo se e prish më shumë,…….., (kishte vazhduar biseda)”, ka thënë bashkatdhetari.

Më pas, ata i kishin kërkuar dy mijë euro që t’ia rregullonin veturën.

Lexo po ashtu Tri veturave të mërgimtarëve iu shpërthehen gomat në Serbi - apelojnë të kihet kujdes në autostradën e Nishit

Bashkatdhetari iu kishte thënë se s’ka mjaftueshëm para për të paguar shumën e kërkuar dhe ata ia kishin zbritur çmimin në 900 euro.

Për shkak që ishte ftohtë, dhe kishte dy fëmijë me vete dhe gruan, ai kishte pranuar. Më pastaj ka thënë se e kanë transportuar në një fshatë më kilometra larg pompës.

“Më thanë do ta çojmë diku për ta rregulluar. Hipëm në kamion dhe aty ishte shume ftohtë, kisha fëmijët, kam përjetuar tmerr”, rrëfen ai.

Më tej ka thënë se pasi ia kanë rregulluar veturën, sërish e kanë ngritur çmimin në 1.500 euro.

Lexo po ashtu Shkon për shërimin e nënës në Beograd, policia serbe e prangos në Merdare mërgimtarin nga Zvicra - familja nuk di asgjë për të

“Më thanë kerri u rregullu, duhet me pagu 1500 euro. Iu thash se nuk kam, vetëm 700 euro. Ia dhashë dhe si në kërcënim më thanë se duhet me ia sjell edhe tjerat”, ka thënë mërgimtari.

Duhet theksuar se të premten, Nezir Mehmetaj nga fshati Rudicë e Klinës, është ndaluar nga Policia serbe në pikën kufitare “Merdare”.

Neziri jeton që 25 vite në Zvicër, dhe kishte qenë për pushime në Kosovë, por për shkak që nëna e tij ishte e sëmurë, ai kishte shkuar në Beograd, për t’ia bërë analizat.

Lexo po ashtu Mërgimtari që iu shpuan gomat e veturës në Serbi: Mos ndaloni te pompa “Lukoil”, aty ua shpojnë gomat!

Teksa po kthehej në Kosovë, ishte ndaluar në kufi nga doganierët serbë, duke i thënë se gjendet në ‘Stop listë’.

Lidhur me këtë Ministria e Punëve të Jashtme iu ka bërë  thirrje qytetarëve të Kosovës që të shmangin udhëtimet drejt dhe përmes Serbisë, për shkak të ndjekjes politike të shtetasve kosovarë me akuza të motivuara politikisht nga qeveria serbe./Telegrafi/