Pas mbërritjes së tij tek Barcelona vitin e kaluar, Hansi Flick solli me vete ish-mesfushorin Thiago Alcantara si pjesë të përkohshme të stafit të tij teknik.
Produkt i akademisë La Masia, Thiago kishte shpallur tërheqjen nga futbolli aktiv në atë kohë dhe iu bashkua klubit me një kontratë afatshkurtër për të ndihmuar Flick në përshtatjen e tij fillestare te Barcelona.
Edhe pse qëndroi në këtë rol vetëm për disa muaj, ai pati një ndikim të madh, duke i lënë përshtypje të forta si lojtarëve ashtu edhe vetë trajnerit gjerman.
Për pasojë, që nga janari kanë qarkulluar zëra për një rikthim të tij, por deri më tani nuk ishte konkretizuar asgjë.
Megjithatë, sipas informacionit më të fundit nga Que T’hi Jugues, Thiago pritet t’i bashkohet sërish stafit të Hansi Flick dhe do të jetë pjesë e ekipit teknik gjatë këtij sezoni.
Duke e përforcuar këtë lajm, gazetari i njohur Fabrizio Romano ka konfirmuar se marrëveshja për rikthimin e ish-talentit të La Masias është 100 për qind e mbyllur.
Në fakt, nëse gjithçka shkon sipas planit, ai mund të fillojë punën në klub që nga java e ardhshme.
Flick vlerëson lart kontributin që Thiago dha gjatë parasezonit të vitit 2024 dhe llogarit shumë tek ai edhe në vazhdim.
Thiago kishte luajtur nën drejtimin e Flick te Bayern Munich, dhe të dy krijuan një marrëdhënie të fortë gjatë kohës së tyre në Bavari./Telegrafi/
