Houthit sulmojnë me raketa Tel Avivin, shefi i OKB-së paralajmëron përshkallëzime në rajon

Rebelët Houthi të Jemenit deklaruan se kishin drejtuar një raketë balistike hipersonike në një objektiv ushtarak të paidentifikuar.

Tani bëhet e ditur se rreth 16 persona u plagosën nga xhamat e thyer pasi raketa e lëshuar nga Jemeni goditi lagjen Jaffa të qytetit izraelit të Tel Avivit.

Ndërsa 14 të tjerë pësuan lëndime të lehta duke nxituar drejt strehimoreve kur ranë sirenat e sulmit.

Siç raportohet, sulmi vjen pasi sulmet ajrore izraelite në kryeqytetin e Jemenit të kontrolluar nga Houthi, Sanaa, dhe qytetin port Hodeida vranë të paktën nëntë persona të enjten.

Sulmet izraelite ishin në përgjigje të një rakete me rreze të gjatë veprimi Houthi që goditi një ndërtesë shkolle në Izraelin qendror, shkruan euronews, përcjell Telegrafi.

Houthit pretenduan gjithashtu një sulm me dron që synonte një objektiv ushtarak të paspecifikuar në Izraelin qendror të enjten.

Ushtria izraelite njoftoi se Houthit e mbështetur nga Irani kanë lëshuar më shumë se 200 raketa dhe drone gjatë luftës Izrael-Hamas në Gaza.

Gjithashtu, ata kanë sulmuar anijet në Detin e Kuq dhe Gjirin e Adenit dhe thonë se nuk do të ndalen derisa të ketë një armëpushim në Gaza.

Ndryshe, sulmet izraelite të enjten shkaktuan “dëm të konsiderueshëm” në portet e kontrolluara nga Houthit në Detin e Kuq që do të çojnë në “reduktimin e menjëhershëm dhe të ndjeshëm të kapacitetit të portit”, sipas zëdhënësit të OKB-së, Stephane Dujarric.

Porti Hodeida ka qenë kyç për dërgesat e ushqimit në Jemen në luftën e tij civile dhjetëvjeçare.

Sekretari i Përgjithshëm i OKB-së, Antonio Guterres paralajmëroi se sulmet e të dyja palëve rrezikojnë përshkallëzim të mëtejshëm në rajon. /Telegrafi/