Harry Styles fton tre refugjatë ukrainas për të parë koncertin e tij në Poloni

Harry Styles ftoi tre refugjatë ukrainas për të parë koncertin e tij “Love On Tour” në Varshavë, Poloni, të dielën mbrëma (3 korrik).

Këngëtari, 29 vjeç, ka udhëtuar nëpër botë si pjesë e turneut të tij të shumëpritur të vitit 2023, i cili do të përfundojë në Itali më vonë këtë muaj.

Dhe ai u bashkua me Komitetin Ndërkombëtar të Shpëtimit (IRC) për të ftuar një familje ukrainase për të parë performancën e tij në stadiumin PGE Narodowy, shkruan DailyMail.

Maryna, vajza e saj Daria, 13 vjeç dhe shoqja e tyre Daria Kathina u detyruan të largoheshin nga shtëpitë e tyre në Ukrainë vitin e kaluar në mes të pushtimit rus.

Ata tani jetojnë në Sosnowiec, Poloni, dhe dukej se po kalonin një kohë të mrekullueshme në koncerti e “Love On Tour” ndërsa brohorisnin Harryn.

Duke folur për përvojën, Maryna – e cila gjithashtu ka një djalë, 10 vjeç – tregoi se si i lejoi ata të ‘harronin’ shqetësimet e tyre pas sfidës për t’u përshtatur me jetën në një vend të ri.

“Që kur u detyruam të largoheshim nga shtëpia jonë në Ukrainë vitin e kaluar, ka qenë një sfidë përshtatja me jetën në një vend të ri – veçanërisht për vajzën time, Daria, dhe djalin tim 10-vjeçar”, tha ajo.

“Unë jam shumë mirënjohës për Harry Styles dhe IRC, të cilët më kanë mbështetur për të ndjekur karrierën time të ëndrrave në Poloni, që na dhanë mundësinë të harrojmë shqetësimet tona për një natë dhe të këndojmë e kërcejmë në koncert”, u shpreh tutje ukrainasja.

Maryna, e cila dëshiron të bëhet shofere tramvaji, dhe familja e saj u larguan nga vendlindja e tyre Mykolayiv në korrik 2022 përpara se të gjenin siguri në Sosnowiec.

Ata tani po rindërtojnë jetën e tyre në qytetin polak, me ndihmën e projektit “Hapi drejt Punës” së IRC-së për refugjatët ukrainas.

Familja është në mesin e pothuajse gjashtë milionë ukrainasve që janë detyruar të largohen nga shtëpitë e tyre në mes të pushtimit rus të vendit.

Lexo po ashtu Të gjitha lajmet nga Harry Styles

IRC ka punuar për të mbështetur më shumë se 94,000 refugjatë ukrainas në Poloni, dhe shumë të tjerë në të gjithë Evropën, Mbretërinë e Bashkuar dhe SHBA, për të rindërtuar jetën e tyre.

Harry është në mes të shfaqjeve të tij “Love On Tour”, të cilat filluan në 2021 në mbështetje të albumeve të tij të dytë dhe të tretë “Fine Line” dhe “Harry’s House”.

Ai tani do të udhëtojë në Gjermani, Austri, Spanjë dhe Portugali gjatë muajve të ardhshëm përpara shfaqjes së tij të fundit në Reggio Emilia, Itali, më 22 korrik. /Telegrafi/