Lewis Hamilton barazon llogaritë. Britaniku i kundërpërgjigjet Sebastian Vettel në garën për Çmimin e Madh të Kinës me një fitore të rëndësishme për të rikthyer moralin pas disfatës së Australisë.

Britaniku përfitoi edhe nga penalizimi i pilotit të Ferrarit i cili u detyrua të respektonte vendimin e marrë nga drejtuesit e garës duke humbur sekonda të vlefshme që gjithsesi nuk e zbritën nga shkalla e dytë e podiumit.

Foto/ Getty Images

Një garë kjo që konfirmoi formën optimale të Ferrarit dhe premton një betejë të ashpër mes dy pilotëve deri në fund të sezonit. Vendi i tretë shkoi për Max Verstappen, i cili zhvilloi një garë spektakolare duke rikuperuar plot 13 pozicione, ndërsa Daniel Ricciardo u rendit i katërti duke lënë pas krahëve Kimi Raikkonen dhe Valteri Bottas, dy zhgënjimet e vërteta të Kinës.

Gjithçka nisi pa probleme për Hamiton që mori komandën por me daljen e Giovinazzit nga pista makina e sigurisë hyri për të evituar aksidentet dhe drejtuesit e garës i detyruan të gjithë pilotët për të hyrë në bokse, gjë që Vettel nuk e bëri dhe vuajti penalizimin që e zbriti në vendin e pestë prapa shokut të skuadrës Kimi Raikkonen.

Këtu nisi edhe gara e vërtetë për gjermanin që parakaloi fillimisht finlandezin dhe më pas Ricciardon e Verstapen. Një goditje e madhe nga ana e ferraristit që konfirmoi momentin e shkëlqyer që po kalon.

Diferenca mes skuadrës Ferrari dhe Red Bull është e dukshme, por ndryshon situata kur bëhet fjalë për Mercedes sepse Hamilton i vetëm në krye nuk lejoi që Vettel ta vendoste për asnjë moment në dyshim kryesimin e britanikut. 10 sekonda diferencë mes tyre që nuk u ngushtuan asnjëherë për të na dhuruar një duel të drejtpërdrejtë.

Raundi i dytë shkon për skuadrën e Mercedes dhe tashmë beteja zhvendoset në shkretëtirë. Pista e Sakhirit në Bahrein do të presë në 16 Prill makinat më spektakolare të planetit për garën e radhës.