Me gomone nga Franca në Angli, 9 shqiptarë shpëtohen nga mbytja

Nëntë emigrantë shqiptarë u shpëtuan në një grykë të vogël në mes të kanalit ujor që ndan Anglinë Jugore me Francën Veriore, teksa po përpiqeshin të kalonin mes erërave të forta.

Tre anije shpëtimi dhe një helikopter u aktivizuan për të gjetur anijen, pasi u raportua se disa njerëz ishin në telashe.

Të tetë burrat dhe një grua u morën nga anija në 5 të mëngjesit të mërkurën.

Ata ishin nisur nga Franca të martën në mbrëmje.

Një zëdhënës i Agjencisë Detare tha se “Ka të dëmtuar, por jo të vdekur. Të gjithë janë në gjendje të mirë. Ata vetëm i ka zënë deti”.

Akoma nuk dihet si u dërgua sinjali për ndihmë nga anija me shqiptarë, sikurse nuk dihet se çfarë ndodhi që anije të kishte problem. Policia Kufitare përjashton problemet me motorin, transmeton syri.net.

Raportohet se Agjencia Kombëtare e Krimit ka nisur hetimet për këtë ngjarje.

Deputeti i Doverit, Çarli Elfik u bëri thirrje autoriteteve të jenë vigjilentë ndaj emigrantëve që përpiqen të hyjnë në Britani ilegalisht.

Ne e dimë se më shumë emigrantë po kthehen nga Calais, pas komenteve të fundit nga Presidenti Macron.

Kjo është arsyeja pse duhet të jemi më vigjilentë se kurrë dhe të mbrojmë kufijtë tanë”, u shpreh deputeti Elfik.

Javën e kaluar u zbulua se qindra emigrant po jetojnë momentalisht afër portit të Calais në Francë, teksa përpiqen të gjejnë një mënyrë për të shkuar në Britani.