“Golden Eagle” funksionalizon pas shumë vitesh aparatin e EHG-së në Klinikën e Pediatrisë në QKUK

Fondacioni humanitar “Golden Eagle”, ka bërë të mërkurën dorëzimin e pajisjeve për ta funksionalizuar aparatin e EHG-së, në Klinikën e Pediatrisë të Qendrës Klinike Universitare të Kosovës (QKUK).

Drejtuesit e kësaj klinike e kanë vlerësuar lartë donacionin e këtij fondacioni duke thënë se atyre do tu lehtësohet puna për mjekimin e fëmijëve, si dhe do të rritet edhe më shumë kujdesi ndaj fëmijëve.

Drejtori i Klinikës së Pediatrisë, Muharrem Avdiu, ka thënë se donacioni ka rëndësi të madhe pasi lehtëson punën në këtë klinikë.

“I përgëzoj për bashkëpunim Fondacionin Golden Eagle, një bashkëpunim të tillë nuk na ka propozuar dikush tjetër. Po t’i kishim pesë kompani të tilla që do të na përkrahnin, ne si Klinikë e Pediatrisë do të kishim funksionuar tepër mirë dhe me pak para nga buxheti i shtetit”, tha Avdiu.

Shefi i Repartit të Neurologjisë, Naim Zeka, tha se pajisjet e aparatit të dhuruar nga “Golden Eagle” ka qenë i nevojshëm dhe është mundësuar funksionalizimi i aparaturës se EHG-së, shkruan Telegrafi.

Nga sot Reparti i Neuropediatrisë do të jetë më i kompletuar dhe do të shkarkohet një numër i madh i pacienteve e kanë kryer mjekimin.

Fisnik Kryeziu nga Fondacioni Humanitar ”Golde Eagle”, ka thënë se nuk do të ndalen me dhurimin e pajisjeve të ndryshme në sektorin shëndetësisë.

Sipas tij, donacione të tilla do të ketë për Klinikën e Pediatrisë në Prizren e Gjilan.

“Shpresojmë se sa do pak kjo pajisje t’u ndihmojë dhe tua lehtësoj punën e mjekeve për mjekimin fëmijëve. Po ashtu i falënderojë të gjithë konsumatorët që konsumojnë produktet e kompanisë dhe kanë kontribuar në mbledhjen e këtij donacioni”, tha Kryeziu.
Ndryshe Fonadacioni Humanitar “Golden Eagle”, është krijuar nga Kompania “Frutex” nga Suhareka. /Telegrafi/