Gjykata e Hagës lëshon urdhër-arrest kundër Putinit

Gjykata Ndërkombëtare Penale në Hagë ka lëshuar një urdhër arresti të premten kundër presidentit rus, Vladimir Putin, duke e akuzuar atë si përgjegjës për krimet e luftës të kryera në Ukrainë. Me të njëjtat akuza po përballet edhe Maria Alekseyevna Lvova-Belova, komisionerja ruse për të drejtat e fëmijëve.

Gjyqtarët e procedurës paraprake të gjykatës vlerësuan se kishte “baza të arsyeshme për të besuar se secili i dyshuar mban përgjegjësi për krimin e luftës të dëbimit të paligjshëm të popullsisë dhe atë të transferimit të paligjshëm të popullsisë nga zonat e pushtuara të Ukrainës në Federatën Ruse, në veçanti të fëmijëve ukrainas”.

“Z. Vladimir Vladimirovich Putin, i lindur më 7 tetor 1952, President i Federatës Ruse, dyshohet se është përgjegjës për krimet e luftës të dëbimit të paligjshëm të popullsisë (fëmijëve) dhe atë të transferimit të paligjshëm të popullsisë (fëmijëve) nga zonat e pushtuara të Ukrainës në Rusi. Federata (sipas nenit 8(2)(a)(vii) dhe 8(2)(b)(viii) të Statutit të Romës). Krimet supozohet se janë kryer në territorin e pushtuar ukrainas të paktën nga 24 shkurt 2022. Ka arsye për të besuar se Putin mban përgjegjësi penale individuale për krimet e lartpërmendura, (i) për kryerjen e akteve drejtpërdrejta, së bashku me të tjerët dhe/ose nëpërmjet të tjerëve (neni 25(3) (a) i Statutit të Romës) dhe (ii) për dështimin e tij për të ushtruar kontrollin e duhur mbi vartësit civilë dhe ushtarakë që kryen aktet, ose lejuan kryerjen e tyre dhe që ishin nën autoritetin dhe kontrollin e tij, në përputhje me përgjegjësinë superiore (neni 28(b) i Statutit të Romës”, shkruan në njoftimin e gjykatës.

Gjyqtarët konsideruan lëshimin e urdhër-arresteve sekrete, por vendosën se bërja e tyre publike mund të “kontribuonte në parandalimin e kryerjes së mëtejshme të krimeve”.

Gjykata gjithashtu lëshoi një urdhër arrest për Maria Alekseyevna Lvova-Belova, komisionerja ruse për të drejtat e fëmijëve, për akuza të ngjashme.

Moska ka mohuar akuzat për krime lufte që kur pushtoi Ukrainën në shkurt të vitit të kaluar. /Telegrafi/