Gjendet trupi i pajetë i qytetarit që dyshohet se ra në lumë në fshatin Deiq të Klinës

Është gjetur trupi i pajetë i personit që ishte raportuar se kishte rënë në lumë në Deiq të Klinës.

Rastin e ka bërë të ditur zëdhënësi i Policisë për rajonin e Pejës, Fadil Gashi.

“Trupi është gjetur 500 metra larg nga vendi ku peshkatarët e kishin parë duke rënë”, ka thënë ai.

Trupin e viktimës nga lumi kanë arritur ta nxjerrin ekipet e  Kërkim-Shpëtimit të Zhytjes të Gardës Kombëtare të FSK-së.

“Gjatë ditës së sotme  ekipet e  Kërkim-Shpëtimit të Zhytjes të Gardës Kombëtare të FSK-së, pas marrjes së informacioneve  për një person të  rënë në lumë në fshatin Deiq të Komunës së Klinës, FSK ka angazhuar ekipet KSH për intervenim dhe në koordinim me Policinë e Kosovës  kanë filluar operacionin e kërkimit- shpëtimit”, njofton FSK.

Gjatë ditës, policia ka njoftuar se kërkimi kishte nisur pasi një grup peshkatarësh në mëngjesin e së dielës, kishin parë një trup që po e zvarriste uji në lumë.

Të njëjtit sipas Gashit, kishin tentuar ta nxirrnin nga uji, mirëpo përpjekja e tyre ishte e pasuksesshme sepse ai ishte zhytur edhe më thellë.

Ndërkaq, pas intervenimit të FSK-së dhe Zjarrfikësve, është arritur të gjendet trupi i pajetë dhe të nxirret nga lumi.

Policia nuk ka dhënë detaje më të hollësishme lidhur me rastin./Telegrafi/