Gjatë javës së kaluar në Ferizaj regjistrohen 20 aksidente dhe 1061 gjoba për vozitësit

Policia e Kosovës në rajonin e Ferizajt gjatë javës së kaluar ka qenë mjaftë aktive në terren me qëllim të parandalimit të aksidenteve. Sipas raportit javor të Policisë në Ferizaj, janë shqiptuar gjithsejtë një mijë e 61 gjoba kundërvajtëse për vozitësit që nuk i kanë respektuar rregullat e komunikacionit. Ndërkaq janë regjistruar gjithsejtë 20 aksidente në rrugë lokale dhe nacionale.

“Policia Rajonale e Ferizajt ka ndërmarrë një sërë aktivitetesh për parandalimin e aksidenteve në komunikacionin rrugor. Gjatë javës së kaluar, nga data 07-13.04.2025, janë shqiptuar 1,061 gjoba kundërvajtëse, si dhe janë pezulluar 12 patentë-shoferë për drejtuesit e mjeteve që kanë kryer shkelje të rënda në trafik”, thuhet në raportin e Policisë.

Sipas policisë nga 20 aksidente që kanë ndodhur në komunikacion, 16 prej tyre janë regjistruar me lëndime në të cilat pësuan 33 persona dhe 4 aksidente me dëme materiale.

“Policia Rajonale e Ferizajt do të vazhdojë me aktivitete të shtuara për të parandaluar aksidentet dhe apelon tek të gjithë drejtuesit e automjeteve që të jenë të kujdesshëm dhe të respektojnë rregullat e trafikut. Ftojmë qytetarët që të bashkëpunojnë me policinë dhe të raportojnë çdo kundërvajtje në trafik”, thuhet në raport./Telegrafi/