Një video që është publikuar në internet dhe që është filmuar nga kamerat e sigurisë, shfaqin momentin kur shoferi kinez i një kamioni tenton të ndalet me hov para vijave të bardha, pasi në semafor ishte ndezur drita e kuqe.

E duke marrë parasysh se para vetes kishte një udhëkryq dhe duhej të reagonte menjëherë, ai përdori frenin në mënyrë të vrullshme që e ndali mjetin e rëndë transportues, por nuk mendoi se do t’i kushtojë shtrenjtë ky veprim, transmeton Telegrafi.

Mallrat që i transportonte dhe i kishte në rimorkio – përkatësisht pllakat gjigante të çelikut “fluturuan” përpara duke shkatërruar plotësisht kabinën e shoferit.

Por pavarësisht faktit që gjykuar nga pamjet shoferi dukej se nuk kishte gjasa t’i shpëtonte vdekjes – ka ndodhur mrekullia. Ai madje ka shpëtuar pa edhe një lëndim të lehtë. /Telegrafi/