Evropa nuk do të jetë pjesë e bisedimeve të paqes Rusi-Ukrainë, njofton i dërguari amerikan

Evropa do të konsultohet – por përfundimisht do të përjashtohet – nga bisedimet e planifikuara të paqes midis Rusisë, SHBA-së dhe Ukrainës, ka zbuluar i dërguari special i Donald Trump për Ukrainën.

I pyetur nëse Evropa do të ishte e pranishme në bisedimet e planifikuara, Keith Kellogg tha se “kjo nuk do të ndodhë”.

Bëhet e ditur se kjo deklaratë do të shkaktojë shqetësim në mesin e disa liderëve evropianë, të cilët nuk i besojnë Trumpit dhe besojnë se siguria e vendit të tyre është e ndërthurur me fatin e Ukrainës.

Ministri i Jashtëm polak, Radoslaw Sikorski, tha se presidenti francez, Emmanuel Macron, kishte ftuar liderët evropianë në Paris të dielën për të diskutuar situatën, shkruan the Guardian, përcjell Telegrafi.

Kellogg tha se një arsye pse bisedimet e mëparshme të paqes midis Ukrainës dhe Rusisë kishin dështuar ishte për shkak të përfshirjes së shumë vendeve që nuk kishin aftësi për të ekzekutuar ndonjë proces të tillë.

“Ne nuk do të shkojmë në atë rrugë”, tha ai në margjinat e Konferencës së Sigurisë në Mynih.

Bëhet e ditur se presidenti i Ukrainës, Volodymyr Zelenskyy, kishte përdorur më herët fjalimin e tij në konferencë për të paralajmëruar se Evropa ka të ngjarë të përjashtohet nga negociatat.

Ai i kërkoi Evropës të rritet dhe të formojë një ushtri në të cilën Ukraina do të luante një rol qendror.

Ndërsa udhëheqësit evropianë, të goditur nga fjalimi konfrontues i zëvendëspresidentit amerikan, JD Vance, janë gjithnjë e më të shqetësuar për qasjen e Trumpit ndaj një marrëveshjeje paqeje në Ukrainë dhe kanë frikë se mund të arrihet një marrëveshje që është e dobishme për SHBA-në, por që ka implikime afatgjata jo vetëm për sigurinë e Ukrainës, por edhe për Evropën.

Kryeministri polak, Donald Tusk, tha: “Evropa ka nevojë urgjente për planin e saj të veprimit në lidhje me Ukrainën dhe sigurinë tonë, ose përndryshe lojtarë të tjerë globalë do të vendosin për të ardhmen tonë. Dhe jo domosdoshmërisht në përputhje me interesin tonë. Ky plan duhet të përgatitet tani. Nuk ka kohë për të humbur.”

Sipas Kellogg, çështjet kritike ishin për të siguruar që lufta të mos rifillonte pas një armëpushimi dhe për të përcaktuar se si Ukraina ruante sovranitetin e saj.

Ai tha se kjo do të kërkonte një garanci të besueshme sigurie, duke shtuar se Trump, si vendimmarrësi i vetëm në SHBA, nuk ishte ende në një pozicion për të përcaktuar një garanci të tillë.

“Trump do të kishte nevojë për një gamë të plotë opsionesh”, tha Kellogg.

Ndryshe, ai njoftoi se po punonte me kontaktet e tij në aleancën e NATO-s, ndërsa Steve Witkoff, i dërguari i Lindjes së Mesme, ishte në kontakt me rusët. /Telegrafi/