Euforia në Real Madrid: Le të shkojmë pas të gjithë trofeve që ofrohen

Mund të jetë vetëm Superkupa e Spanjës, por Real Madridi po ngre sërish trofe. Thatësira zgjati një vit e gjysmë, por ndjenja rreth klubit është se kjo mund të lajmërojë fillimin e një periudhe tjetër të suksesshme për Los Blancos.

Vetëbesimi dhe guximi i ekipit është rikthyer dhe po rritet çdo javë që kalon. Me Carlo Ancelottin në krye, Real Madrid po e shikon pjesën tjetër të sezonit me optimizëm të jashtëzakonshëm.

Sfidat përpara

Rezultatet e shkëlqyera dhe ndjenja e kontrollit të qetësisë që Ancelotti ka rikthyer në Real Madrid po dëshmojnë të drejtë ata që donin që ai të rikthehej në verë.

“Jam shumë i lumtur që mund të jem këtu, të kthehem dhe të fitoj me Real Madridin”, kishte deklaruar Ancelotti. “Është nder të jem trajner i këtij ekipi dhe këtij klubi”.

Trajneri italian beson fuqishëm se klubi është gati të luftojë sërish për trofetë e mëdhenj.

“Ne do të garojmë për trofetë e tjerë”, shtoi Ancelotti. “Arsyeja e parë është sepse ne kemi një skuadër shumë të mirë. Atmosfera është gjithashtu e mirë”.

Lexo po ashtu Rivalë të përbetuar, por Barcelona uron Real Madridin për triumfin në Superkupë

“Ne kemi forcën për të luftuar për të gjithë trofetë”.

Këtë besim ndan edhe presidenti i Real Madridit, Florentino Perez, i cili është i emocionuar për të parë se çfarë do të sjellë e ardhmja.

“Ne jemi në fillimin e një epoke të re”, potencoi Florentino Perez për Movistar.

Ancelotti mori përsipër një ekip që ishte kryesisht i shpërbërë dhe me vështirësi në mbrojtje, por ai ka krijuar një bazë solide me të gjithë lojtarët që tregojnë përkushtim të jashtëzakonshëm në të gjithë fushën, dhe skuadra po lulëzon si rezultat.

Ambicia dhe sakrifica

Me pak më shumë se gjysmën e sezonit të luajtur, trajneri i Real Madridit ka krijuar një ekip që është i ri dhe modern, por i kombinuar me përvojën dhe një dëshirë të egër për të fituar.

“Ndihem i qetë sepse kisha dyshime për cilësinë e mbrojtjes”, ka thënë Ancelotti.

“Kur fiton shumë mendon se je skuadra më e bukur, se luan futbollin më të mirë dhe angazhimi më pas zvogëlohet shumë”.

Lexo po ashtu Të gjitha lajmet nga Real Madrid

“Fatmirësisht sakrifica e lojtarëve tanë është e lartë. Mendoj se lojtarët e mi nuk janë të bukur… janë shumë të shëmtuar”, shtoi më tej ai.

Shenjat janë tepër pozitive rreth Estadio Santiago Bernabeu tani. Nuk është befasi që besimi po rrjedh sërish te Real Madrid. /Telegrafi/