Eshtrat e gjetura në oborrin e Ali Ahmetit, flet historiani Xhemaili (Foto)

Organet hetuese dje kanë gjetur eshtra në pusin e shtëpisë së vjetër të Ali Ahmetit, kryetar i BDI-së, në Zajaz të Kërçovës, përcjell Telegrafi Maqedoni.

Historiani dhe profesori universitar e konfirmon këtë gjetje duke thënë se në vitin 1913 janë bërë vrasje masive në Kërçovë dhe rrethinë.

”NË VITIN 1913 U BËNË VRASJE MASIVE NË KËRÇOVË ME RRETHINË.
Në fshatin Zajaz në fillim u masakruan 40 burra, të cilët u hodhën në pus, nga një bandë çetnike-serbe. Ndërsa në muajin tetor nga po i njëjti fshat u vranë mbi 200 burra dhe mbi 800 libra u dogjën
Komanda serbe për ta shuar kryengritjen e Shtatorit të vitit 1913, kishte paraparë sulmin kundrejt Dibrës në tre drejtime, i pari ishte drejtimi: Manastir-Ohër-Strugë, i dyti Tetovë-Gostivar-Mavrovë dhe drejtimi i tretë ishte, Kërçovë fshati Izvor-Dibër. Vija e rezistencës tani më tërhiqej nga Struga, Kërçova, Gostivari e sidomos në rrethin e Mavrovës.”

”Me ardhjen e forcave të reja nga Shkupi dhe Prilepi ushtria serbe e filloi ofensivën e saj të dytë dhe kori fitore pranë fshatit Izvor dhe malit Jama dhe vazhdoi marshimin në drejtim të Gliçnikut. Ushtria serbe me luftë e pushtoi përsëri Kërçovën më 28 shtator 1913. Kjo vërtetohet edhe në raportin ushtarak të njësitit serb Lazareviq, i cili lajmëronte komandantin e Armatës së III, “se pas luftimeve me shqiptarët e mora përsëri Kërçovën me njësitin tim”. Me këtë rast në qytetin e Kërçovës u vranë 70 burra, nga të rrahurit dhe trupat e tyre u dogjën, këtë e verifikon komisioni Ballkanik, i cili vazhdon më poshtë: në fshatin Plasnicë u gjetën 6 të vrarë dhe 40 të tjerrë ishin vra në muajin tetor dhe ishin djegur 5 shtëpi. Poashtu edhe shumë fshatra tjerë për rreth Kërçovës u dogjën dhe meshkujt u vranë dhe u masakruan. Në Kërçovë ndër të parët u vra Hoxha i qytetit.”

”Kërçova pas kryengritjes së Dibrës u shndërrua në kryqëzatë kryesore të operacioneve luftarake, ajo në mësymjen e dytë pësoi terror të paparë, sipas projektit që e realizoi banda çetniko-serbe midis Gostivarit dhe Kërçovës, që e kishte përgatitur me kohë nënprefekti dhe çetniku i njohur në Kërçovë me rrethinë, i ashtuquajturi vojvoda Brkiq, me të vepronte Stanko Dimitriveviq dhe Mihajllo Josifoviq (Mikajl Brodit). Ndërsa në fshatin Zajaz në fillim u masakruan 40 burra, të cilët u hodhën në pus, nga një bandë çetnike-serbe. Ndërsa në muajin tetor nga po i njëjti fshat u vranë mbi 200 burra dhe mbi 800 libra u dogjën. Këto forca çetnike përsëri iu vërsulën Kërçovës ku vranë mbi 184 vetë.”

”Siç njofton i njëjti ushtarak, “se çeta e kapitenit Danil Belimarkoviq edhe pse qëndroi heroikisht, prapë se prapë regjimenti i tretë në përleshje me vendasit çeta e Danillit humbi 40-50 njerëz. Nga humbjet që pësoi ushtria jonë (serbe) në luftimet kundër mbrojtësve të këtij katundi dhe katundarëve përreth, u hakmorëm duke e djegur Zajazin” dhe duke vrarë mbi katërdhjet fshatarë.”

”Në këtë kohë lufte në Kërçovë dhe rrethinë pushtuesi serb e drejtonte nëpërmjet organeve ushtarako-policore. Për ta pasur popullin nën kontroll të plotë, pushtetmbajtësit e ndanë Kërçovën në 14 komuna, ku administrativisht përfshiheshin 78 fshatra-vendbanime. Për seli të komunave zgjodhën vendbanimet e banuara me popullsi, siç i quanin ata, serbe, që ishin të besimit ortodoks. Kështu Zajazi me rrethinë, që përbën një tërësi rajonale, ku fshatrat prej Zajazit ndaheshin vetëm me një megjë, rrugë, përrua apo çukë kodre, u ndanë në tri komuna: Zajazi, Kollara dhe Baçishti në komunën e Milincës, Drogomishti i Madh dhe Dragomishti i Vogël në komunën e Premkës dhe Greshnica, Dllapkindolli, Reçani i Zajazit, Leshnica, Trapçindolli dhe Kolibari në komunën e Osllomesë. Një situatë e njëjtë ishte edhe me fshatrat e tjerë shqiptarë. Kjo ndarje administrative e pushtetit ushtarako-policor serb kishte të vetmin qëllim t’i kombinojë masat administrative, territorin e ushtrisë e të policisë dhe veprimtarinë propagandistike për të mbytur kërkesat e drejta të popullsisë shqiptare në këto treva.”

Lexo po ashtu Kështu duken eshtrat e gjetura në varrin masiv në oborrin e Ali Ahmetit (Video)

”Presionet, rekrutimet me dhunë në të ashtuquajturat “batalione vullnetare”, grabitjet e të mirave materiale, bagëtive, marrja e njerëzve në punë angari, tatimet e renda të disa llojeve që ishin të papërballueshme nga popullata e kësaj ane bënë që i ashtuquajturi “çlirimin serb” lufta ishte për një pastrim etnik. Zajazi ishte në shënjestër të hakmarrjes së forcave të armatosura serbe. Zajazin me rrethinë e priste i njëjti fat si Pesoqanin, Sopin, Starocin, Braqanin (Tekja e Madhe), e shumë e shumë fshatra të tjerë.
Një masakër e organizuar ndodh edhe kur sulmohet komuna Reshtanit nga kaçaku Ali Dedja me pretekst se gjoja ky po fshihet në fshatin Greshnicë. Çetnikët serb në këtë fshat i mblodhi tërë fshatin dhe nga ai grumbull fshatarësh morën 12 vetë për ti çuar në fshatin Zajaz. Por më vonë endëruan mendjen duke i pushkatuar te proi i Plakës këta fshatarë: Rufat Daljen, Lazam Daljen, Rrahit Abazin, Sadin Ramën, Qerim Tarin, Beqir Maksutin. Mirëpo, siç pohojnë më të vjetrit e fshatit, kur kanë shkuar t’i sjellin kufomat, janë gjetur jo 6, por 14 të vrarë, prej tyre edhe 3 kanë qenë fëmijë. Pastaj u vranë në fshatin Tuhin 5 vetë, në fshatin Pllasnicë u vranë 6 vetë, ndërsa pas shuarjes së kryengritje u vranë mbi 40 vetë, dhe u dogjën 5 shtëpi. Në fshatin Llapkindoll u masakruan 26 veta, ndërsa fshati u dogj. Në fshatin Llagje u masakruan 5 veta, në fshatin Kolibar u masakruan 6 veta.”
”Në fshatin Kolari u masakruan 7 veta. Poashtu nga një bandë serbe ishte plaçkitur edhe Leshnica, Dragomishta Tuhini e shumë fshatra tjerë. Gjenocidi serb në këto anë të ushtruar mbi popullsinë shqiptare në vitet 1912-1913, madje edhe më vonë, bëheshin me të vetmin qëllim që nëpërmjet jetës së padurueshme, së pari nëpër fshatra ku kompaktësia ishte e madhe, të bëhej shpërngulja masive.”(sic) shkruan profesor Vebi Xhemaili, në Facebook./Telegrafi/

Lexo po ashtu Gjendet varr masiv në oborrin e shtëpisë së Ali Ahmetit në Kërçovë (Foto)