Enzo Maresca kritikon hapur yllin e Chelseat dhe i kërkon të përmirësohet

Ai ndoshta ka shënuar në fitoren me rezultat 3-1 ndaj Wolves në shtëpi, por një lojtar i Chelseat është urdhëruar që të përmirësohet nga Enzo Maresca. 

Chelsea i dha fund serisë prej pesë ndeshjesh pa fitore në Ligën Premier, falë golave nga Tosin Adarabioyo, Marc Cucurella dhe Noni Madueke që iu siguruan tri pikët. 

Madueke, i cili në këtë sfidë luajti për 84 minuta para se të zëvendësohej nga Tyrique George, e shënoi golin e tij të shtatë të sezonit ndaj Wolves, të cilët pozicionohen në pozitën e 17-të në tabelë. 

Por pas fishkëllimës së fundit, tekniku italian ka urdhëruar Madueken që ta përmirësojë etikën e punës. 

“Ai mund të përmirësohet në sulm, por ndoshta pasi e shënoi golin ai ndaloi së luajturi”. 

“Kjo duhet të jetë gjëja që ne duhet ta përmirësojmë menjëherë. Kurrë mos jeni të gëzuar nëse shënoni një ose dy, gjithmonë duhet të tentoni më shumë”. 

“Pasi ai shënoi golin ndaloi së luajturi dhe kjo është diçka në të cilën duhet të përmirësohemi”, ka thënë Maresca. 

Kjo nuk është hera e parë që Maresca e ka kritikuar Madueken publikisht, pasi këtë e ka bërë edhe më parë. 

Muajin e kaluar, italiani përmendi vetëkënaqësinë dhe etikën e punës kur shpjegoi vendimin e tij pse e la Madueken në bankë në fitoren ndaj Aston Villas./Telegrafi/