Ekipi nga Kosova në finalen botërore të ‘Red Bull Reign’ në SHBA

Më 14 dhe 15 shtator u zhvillua finalja botërore e Red Bull Reign, në partneritet me Goodman League në fushat e njohura Barry Farm në Uashington, D.C.
Red Bull Reign është një turne unik 3 me 3 i basketbollit.

14 ekipe ndërkombëtare sfiduan basketbollistët më të mirë të botës për të paraqitur aftësitë e tyre në praktikë dhe një shans për t’u kurorëzuar kampionet e streetball-it.

Këtë vit u shtua një finale e femrave të SHBA-së me 8 ekipe të gatshëm për të garuar për titullin e parë të Red Bull Reign Women.
Ky turne u realizua në dy grupe me nga 7 ekipe. Në të njëjtën kohë u zhvilluan nga dy ndeshje në gjysmë-fushë, loja zgjatë tetë minuta ose cili arrin i pari të shënoj 21 pikë.

Kosova ishte pjesë e këtij turneu me përfaqësuesit e zgjedhur në Finalen Kombëtare të mbajtur në Prishtinë, ku ekipi Che Bar me Basketbollistët Fikret Shatri, Ardit Pepaj, Fisnik Juniku dhe Arian Mehmeti, arritën të kurorëzohen si fituesit kombëtar në Red Bull Reign Kosova dhe arritën të përfaqësojnë vendin tonë në këtë turne.

Përfaqësuesit e Kosovës arritën që nga të gjitha ndeshjet të grumbullonin 87 pikë duke e mposhtur Holandën, Malin e Zi dhe Filipinet, mirëpo fatin e njëjtë nuk e patën gjatë ndeshjes me Amerikën, Afrikën dhe Kazakistanin. Edhe pse nuk arritën të kualifikohen për në gjysmë finale ata treguan një lojë të mire si dhe arritën t’i takonin ish-lojtarët e NBA-së të cilët ishin pjesë e këtij turneu.

Ky turne me simboliken që ka, meriton të marrë mbështetje edhe më të madhe duke përgatitur dhe inkurajuar sportistët tanë, që të jenë sa më aktivë, në mënyrë që Kosova të jetë pjesëmarrëse edhe në turnet e radhës, që organizohen nga Red Bull.

Këto fitore të sportistëve tanë janë fitore për vetë Kosovën dhe imazhin e saj në arenën ndërkombëtare. /Telegrafi/