Edhe vajza 2-vjeçare e një përkthyeseje të një kompanie amerikane është shkelur për vdekje, publikohen pamjet e kaosit në aeroportin e Kabulit

Të paktën edhe shtatë persona të tjerë kanë gjetur vdekjen në aeroportin e Kabulit nga goditja e turmave, ndërsa mijëra afganë në panik përpiqen të largohen nga vendi, tha të dielën ushtria britanike.

Që nga marrja nën kontroll e talebanëve javën e kaluar, turma të mëdha afganësh janë rreshtuar jashtë aeroportit të Kabulit në temperatura përvëluese për të provuar të sigurojnë një vend në një fluturim evakuimi jashtë vendit.

Edhe pse ushtria britanike konfirmoi shtatë vdekje, dëshmitarët okularë në terren pohojnë se shifra reale është shumë më e lartë, shkruan Business Insider, përcjell Telegrafi.

Madje, siç bëhet e ditur më tej, një nga të vrarët ishte një foshnjë 2-vjeçare, e cila u shkel për vdekje nga turma e madhe, sipas The New York Times.

The scene at Kabul airport several hours ago per source from an NGO who is trying to get people out. Main problem is that it's impossible to pass the gates and get to the planes even if you are on an evacuees list pic.twitter.com/b3bZn5B34Z

— Barak Ravid (@BarakRavid) August 21, 2021

Vogëlushja ishte fëmija i një ish-përkthyeseje të një kompanie amerikane që po përpiqej të largohej nga Kabuli së bashku me familjen e saj, raportoi gazeta.

Kur turma “u fry”, përkthyesja dhe familja e saj ranë përtokë. Ajo humbi nga sytë vajzën e saj dhe më vonë zbuloi se ishte shtypur për vdekje.

“Ndjeva terror të pastër”, tha gruaja për The New York Times. “Unë nuk mund ta shpëtoja atë”.

Ndërkohë Stuart Ramsey i Sky News përshkroi skenat kaotike ndërsa ushtarakët tërhoqën njerëzit nga turma dhe mjekët nxituan “nga viktima tjetër në tjetrën, pastaj tjetrën dhe tjetrën”.

Ndërsa Kim Sengupta e Independent raportoi se ishte dëshmitar i disa vdekjeve të shkaktuara nga shtypja e turmës dhe nxehtësia në aeroportin e Kabulit.

Ai tha se numri zyrtar i vdekjeve ishte 12, por shifra e vërtetë ishte pothuajse me siguri shumë më e lartë.

Duke folur për një kanal televiziv shtetëror iranian të shtunën në mbrëmje, zëdhënësi i talebanëve Mohammad Naeem fajësoi Amerikën për vdekjet në aeroport, sipas Associated Press. /Telegrafi/