A e adhurojnë shqiptarët e Kosovës figurën e Enver Hoxhës?

Diktatori komunist i cili drejtoi Shqipërinë për shumë vite, Enver Hoxha kishte raporte komplekse me Kosovën ndër vite.

Gjatë viteve të para të qeverisë së tij ai mbështeti idenë se Kosova duhej të ishte pjesë e Jugosllavisë, por ky qëndrim ndryshoi kur raportet e tij me Jugosllavinë u prishën.

Pas këtyre ngjarjeve Hoxha mbështeti nacionalizmin shqiptar në Kosovë.

Në emisionin “Komplot” në RTV Dukagjini për lidhjen e kosovarëve me Enver Hoxhën kanë debatuar Mustafë Bajrami dhe Arianit Sllamniku.

Profesori Mustafë Bajrami thotë se shqiptarë në Kosovë e kanë parë Enver Hoxhën si shpresë të vetme për pozitën e tyre në ish-Jugosllavi.

“Figura e Enver Hoxhës adhurohet në Kosovë për shkak të shpresave që i kanë pasur shqiptarët e Kosovës te ai. Me gjitha traumat, vrasjet që ka bërë Enver Hoxha, ai është lideri i parë që ka bërë shtet si ka hije”, ka deklaruar Bajrami.

Por ndryshe mendon Sllamniku, i cili thotë se asnjë pjesëtarë i elitave intelektuale në Kosovë nuk ka pasur simpati për Enver Hoxhën.

“Asnjë shtresë e mesme dhe e lartë intelektuale e Kosovës nuk ka pasur simpati për Enver Hoxhën. Nuk ka asnjë poezi të thjeshtë nga Kosova për Enver Hoxhën”.

“Shqipëria e Enver Hoxhës ka mbajtur gjallë shpirtin e shqiptarëve të Kosovës. Me gjithë anomalitë që ka pasur, po të mos ishte ajo Shqipëri siç ka qenë, me vrasje e burgosje, ajo Shqipëri ka mbajtur frymën e shqiptarëve në Kosovë”, është përgjigjur Bajrami.

Sllamniku thotë se Hoxha nuk mund të ketë bërë diçka për Kosovën kur ai ka pasur këshilltarë Milladin Popoviqin./Telegrafi/