“A duhet ta vrasim veten?”: Palestinezët e zhvendosur të shqetësuar se ku të shkojnë pas një viti lufte

Disa baballarë palestinezë në Gaza thanë se familjet e tyre nuk mund të përballen me një valë tjetër zhvendosjeje, pasi forcat izraelite nisën sulme të reja ajrore dhe tokësore në veri të Gazas.

Pamjet nga Jabalya treguan fëmijë të vegjël dhe gra që ecnin të lodhura përgjatë rrugëve me pluhur.

Kjo pasi ushtria izraelite kërkoi evakuimin e veriut të Gazës drejt “zonës humanitare” të caktuar nga Izraeli në Al-Mawasi në Khan Younis.

Por, banorët thonë se janë të kujdesshëm ndaj përpjekjeve për të ikur nga lagjja e rrethuar në kërkim të strehimit, duke përmendur sulmet e shumta izraelite që synojnë militantët e Hamasit në “zonat e sigurta” të përcaktuara nga Izraeli.

“Nuk e di ku të shkoj”, tha një banor, shkruan CNN.

“Çfarë të bëjmë? Kemi fëmijë, kemi gra, kemi pleq. Ku duhet të shkojmë? Çfarë duhet të bëjmë? A duhet ta vrasim veten?”, vazhdoi ai.

“Unë do të vdes dhe nuk do të shkoj në jug”, vazhdoi banori duke shtuar se po përpiqej të mbronte 20 të afërm të tjerë nga bombardimet e Izraelit.

“Ne po rezistojmë dhe nuk do ta lëmë veriun, edhe nëse vdes këtu”.

Ofensiva izraelite në Gaza që nga sulmet e 7 tetorit të udhëhequra nga Hamasi ka zhvendosur 1.9 milionë njerëz, sipas OKB-së.

Së fundmi, agjencia e OKB-së për refugjatët palestinezë paralajmëroi se enklava “është bërë një vend i papërshtatshëm për njerëzit”, duke përmendur shkatërrimin, urinë dhe sëmundjet.

“Ata na kanë poshtëruar dhe na kanë gënjyer. E gjithë familja ime jeton në jug në një tendë dhe ata nuk janë aspak të sigurt”, tha Mohammad Ibrahim, baba i dy fëmijëve në Jabalya. /Telegrafi/