Të dyshuarit për vrasjen e të riut V.S., sot në Mitrovicë, nesër do të dalin para Gjykatës.
Avokati i njërit nga të arrestuarit, H.V., i cili dyshohet për këtë vrasje, konfirmoi se ata sot janë marrë nga Policia, ndërsa nesër do të procedohen në Gjykatë.
Avokati Musa Damati tha për KosovaPress se klienti i tij H.V dyshohet për veprën penale vrasje e rëndë.
“Ky rast nesër do të procedohet në Gjykatën Themelore të Mitrovicës për të vendosur lidhur me caktimin e masë së paraburgimit për dy të dyshuarit”, tha Damati.
Ndryshe, sot në mëngjes, pranë gjimnazit “Frang Bardhi” në Mitrovicë, nga të shtënat me armë është vrarë V.S., 21-vjeçar nga Mitrovica. Policia ka arrestuar dy të dyshuarit, V.B. dhe H.V., nxënës të gjimnazit “Frang Bardhi”.
Pas tragjedisë, për Klan Kosova ka folur babai i viktimës që ka treguar se para afro gjashtë muajve i ka ndihmuar të birit t’i rregullojë disa probleme që ka pasur me disa të rinj, njofton Klan Kosova.
Klani ka qëndruar edhe në shtëpinë e dorasit, ku është mbledhur farefisi, në tentim për të kërkuar faljen për veprimin e birit të tyre.
