Administrata e presidentit amerikan Donald Trump ka vendosur të ndalojë zhvillimin e një "plani paqeje" për Ukrainën, për të zhvilluar bisedime me partnerët evropianë.
The Telegraph raporton se Keith Kellogg, i dërguari special i Trump për Ukrainën dhe Rusinë, u premtoi diplomatëve evropianë se do të konsultohej me aleatët e NATO-s përpara se të finalizonte “planin e paqes”.
Kellogg ka premtuar se do të zhvillojë bisedime me “kryeministrat dhe presidentët” e shteteve të NATO-s, transmeton Telegrafi.
Ndërkohë, elementë të "planit të paqes" thuhet se do të prezantohen në Konferencën e Sigurisë në Mynih këtë fundjavë - pavarësisht se Kellogg më parë deklaroi se nuk do ta bënte këtë.
Plani mund të përfshijë mbështetje të vazhdueshme ushtarake për Ukrainën në këmbim të qasjes në burimet e saj minerale.
Burimet e The Telegraph, thonë se Kellogg siguroi partnerët evropianë për synimin e SHBA për të forcuar pozicionin e Ukrainës në çdo negociatë të ardhshme me Rusinë. /Telegrafi/
