Deputetët e opozitës përplasen me Golën në Komisionin ku po raportonte ministrja Nagavci

Deputetë të opozitës dhe pozitës janë përplasur në Komisionin për Arsim, Shkencë, Teknologji, Inovacion, Kulturë, Rini dhe Sport.

Deri tek përplasja në mes të dy deputetëve ka ardhur kur kryetari i këtij komisioni nga radhët e LVV-së, Ardian Gola nuk ia ka dhënë fjalën deputetes së PDK-së Eliza Hoxha, me arsyetimin se po e konsumon kohën kot.

Anëtarja e këtij komisioni, Eliza Hoxha ka deklaruar se janë bërë shkelje ligjore në emërimin e një anëtari të jashtëm të Këshillit Shtetëror të Cilësisë (KShC).

Për këtë, ajo ka kërkuar nga ministrja Arbërie Nagavci, që të bëhet zëvendësimi i tij, por që kjo e fundit tha se i njëjti është përzgjedhur nga partnerët ndërkombëtar.

“Elizë të lutem mos e konsumo kohën me çështjet që nuk kanë të bëjnë me pikën e rendit të ditës”, tha Gola.

Ndërsa, Hoxha theksoi “e konsumoj edhe mirë… tema është e njëjtë, për ligj po flas”.

Ndërsa Gola tha se çështjet që kanë të bëjnë me KSHC janë çështje tjera.

“Nuk mundesh me ma ndalu”, tha Hoxha.

“Jo, mundem se pse duhet me ju dhënë hapësirë tjerëve”, tha ai.

Pas kësaj përplasjeje, deputetja Hoxha edhe deputetja nga radhët e LDK-së, Vlora Dumoshi në shenjë proteste e ka lëshuar mbledhjen e komisionit.  /Telegrafi/