Deputetë nga opozita nuk marrin pjesë në raportim, Hajdari: Do të rishikojmë të gjitha zonat ekonomike

Ministrja e Industrisë, Ndërmarrësisë dhe Tregtisë, Rozeta Hajdari ka raportuar sot në Komisionin për Mbikëqyrje Financiare për raportin e auditimit për pasqyrat financiare për vitin 2020.

Hajdari ka ngritur disa çështje për siç tha ajo keqpërdorime me paranë publike, parregullsi dhe mangësi nga ish-MTI tani MINT.

Por, shqetësuese, sipas saj mbetet projekti për ndërtimin e Parkut Industrial në Lumadh.

Megjithatë, deputetë nga opozita PDK dhe LDK nuk morën pjesë në këtë mbledhje, as kryetarja e Komisionit, Hykmete Bajrami që vije nga LDK-ja, raporton KosovaPress.

Deputetja nga AAK, Albana Bytyqi bojkotoi mbledhjen, derisa tha se meqë nuk janë pjesëmarrës asnjë deputetë nga opozita, nuk do të marrin pjesë as deputetët e kësaj partie.

Në Komisionin e kryesuar nga zëvendëskryetarja Arta Bajralija nga VV, Hajdari tha se nuk është vetëm Parku Industrial në Lumadh që ka pasur parregullsi dhe mangësi, por sipas saj, ka shumë parregullsi për shumë parqe, për punësim me kontrata mbi vepër dhe çështje të tjera nga ish-MTI tani MINT.

Lexo po ashtu Ministrja Hajdari raporton para deputetëve në Komisionin për Mbikëqyrjen e Financave Publike

Hajdari tha se do të iniciojnë rishikimin e të gjitha zonave ekonomike. Sipas saj, fatin e këtij rishikimi do ta ketë edhe Zona Ekonomike në Drenas.

Ajo shtoi se do të marrin të gjitha masat për evitimin e të gjitha mangësive sa i përket të gjeturave nga auditori.

“Gjetjet për Parkun Industrial në Lumadh vërtet janë brengosëse, për tejkalimin e shpenzimeve. Ky projekt milionësh është vërtet për të na shqetësuar sa i përket keqpërdorimeve të parasë publike, duke devijuar projektin dhe rrit koston e ndërtimit në këtë mënyrë”, theksoi Hajdari. /Telegrafi/