Deponia e Mirashit “bombë” e kurdisur ekologjike

Deponia e mbeturinave në Mirash është duke paraqitur një rrezik të madh ambiental për vendin. Kjo pasi që pasi që rrjedhja e ujërave të zeza nga kjo deponi do të shkojnë drejt lumit Sitnica.

Kështu tha sot në një konferencë për media kryeshefi ekzekutiv i Kompanisë për Menaxhimin e Deponive të Kosovës (KMDK), Abdullah Haxhiu.

Ai është shprehur i shqetësuar sepse pavarësisht të gjitha kërkesave të bëra për rregullimin e këtij problemi ekologjik që po paraqet kjo deponi, mungon përkrahja financiare në projekt-buxhetin e miratuar nga Qeveria.

“Gjendja është shumë e rëndë, është shumë e rrezikshme sepse niveli i ujërave në deponi sanitare të këtij liqeni akumulues është duke ardhur në nivelin e lumit Sitnica. Rreziku është që kahja e ujërave më nuk do të vjen drejt Sitnicës në deponi, por do të ndodhë e kundërta prej deponisë në Sitnicë, por edhe paraqet si rrezik shfaqjen e zjarreve ku me këtë rast edhe ish-ministri Agani (Ferid) del para medieve edhe thotë ‘Deponia e Mirashit, është një bombë ekologjike, një bombë e kurdisur’”, tha Haxhiu.

Sa i përket gjendjes financiare të kompanisë që ai drejton, Haxhiu tha se ka pasur një përmirësim në këtë drejtim.

Sipas tij, është rritur kapaciteti për deponimin e mbeturinave që ka rezultuar me rritje të inkasimit të të hyrave.

Këtë problem që e shfaqi sot Haxhiu është duke e trajtuar edhe kompania gjermane GIZ në mënyrë që të nxirret një rekomandim.

Kryeshefi i KMDK-së, Avdullah Haxhiu, tha se nëse Qeveria nuk ofron mbështetje financiare atëherë kjo kompani nuk do të ketë kapacitet për t’i menaxhuar ujërat e zeza dhe si pasojë do të ketë rrezik edhe për komunat tjera. /kp/