Dënohet me 3 vjet e 6 muaj burgim i akuzuari për përgatitje të sulmit terrorist ndaj komunitetit LGBTI

Gjykata Themelore në Prishtinë, Departamenti Special ka shpallur aktgjykimin kundër të akuzuarit Blend Vrajolli për shkak të veprës penale të rikualifikuar “përgatitja e veprave terroriste ose veprave penale kundër rendit kushtetues dhe sigurisë së Republikës së Kosovës”, nga neni 138 paragrafi 1 lidhur me veprën penale “Trajnimi për terrorizëm”, nga neni 133 të Kodit Penal të Republikës së Kosovës.

Në njoftimin për media bëhet e ditur se Blend Vrajolli u shpall fajtor dhe është dënuar me dënim me burgim në kohëzgjatje prej tri vite e gjashtë muaj.

Koha e kaluar nën masën e paraburgimit nga data 21.02.2023, do t’i llogaritet në dënimin e shqiptuar me burgim.

“Me aktvendim të veçantë PS.46/2023, të datës 05 mars 2024, gjykata konform nenit 366 paragrafi 1 pika 1.1 lidhur me paragrafin 3; 4; 5 dhe 6 të KPPRK-së, të akuzuarit B.V ia vazhdon masën e paraburgimit deri në plotfuqishmërinë e aktgjykimit, por jo më shumë se dënimi i shqiptuar me aktgjykimin e Gjykatës Themelore Prishtinë”, thuhet më tej.

Sipas njoftimit të Gjykatës Themelore të Prishtinës obligohet i akuzuari që të paguajë shumën prej njëqind €uro (100 €) në emër të shpenzimeve procedurale dhe shumën prej njëqind 100€ në emër të fondit për kompensimin e viktimave të krimit, të gjitha këto në afat prej 15 ditëve pas plotfuqishmërisë së këtij aktgjykimi, nën kërcënim të përmbarimit të dhunshëm.

I akuzuari Blend Vrajolli në periudhën kohore disa mujore e deri në datën e arrestimit të tij më datë 21.02.2023, kishte bërë plane dhe ishte përgatitur për ndërmarrjen e sulmeve terroriste në Kosovë, në sheshin e Prishtinës ndaj pjesëtarëve të komunitetit LGBT dhe në pikën kufitare Merdarë me materie të rrezikshme dhe vdekjeprurëse për jetën e njerëzve në kombinim me Nitrat de Calcium, e të cilat në detaje ai i kishte shpalosur gjatë komunikimit të zhvilluar përmes aplikacionit Threema, nga profili ”Proxyal”, me një person me emrin “Al Muhaxheri – ( i huaj)”.

Vrajolli nga personi me emrin “Al Muhaxheri” kishte kërkuar udhëzime për krijimin e bombave artizanale apo materie eksplozive, për realizimin e planit të tij, e që me rastin e udhëtimit nga Arabia Saudite përmes Aeroportit të Shkupit për në Kosovë, me rastin e ndalimit dhe kontrollit në pikën kufitare Hani i Elezit, i njëjti ishte arrestuar nga Policia e Kosovës DKT në Prishtinë.

Kundër këtij aktgjykimi, palët kanë të drejtë ankese në Gjykatën e Apelit të Kosovës përmes Gjykatës Themelore në Prishtinë. /Telegrafi/