Dëmtohet gypi, banorët në rrugët “Llapi” dhe “Ilir Konushevci” mbeten pa ujë të pijshëm deri nesër në mesditë

Për shkak të një dëmtimi të gypit sot në rrugën e “Llapit” në Prishtinë, konsumatorët e kësaj zone kanë mbetur pa ujë të pijshëm që nga ora 18:30.

Dëmtimi i gypit të ujit ka ndodhur nga palë të treta, nërkaq sipas njoftimit të KRU Prishtina sanimi i dëmit nuk mund të bëhet deri në mesditë.

“Për shkak të defektit në gypin e ujit me diametër fi 200 mm në rrugën e ” Llapit” në Prishtinë, defekt i shkaktuar nga papërgjegjësia e palëve të treta, ju njoftojmë se natyra jashtëzakonisht e ndërlikuar e dëmtimit të gypit e bën të pamundur sanimin e tij deri nesër në mesditë”, thuhet në njoftim.

Sipas po të njëjtit njoftim, “Dëmtimi është në murin e pusetës dhe betoni mbi gyp e bën të pamundur sanimin gjatë natës së sonte”.

Pa ujë të pijshëm janë konsumatorët e rrugës së ” Llapit” deri te rruga ” Ilir Konushevci” në Prishtinë.

Sipas njoftimit ende nuk dihet se kur do të kthehet gjendja në normalitet me furnizim me ujë të pijshëm për konsumatorët duke filluar nga rruga e “Llapit” e deri te ajo “Ilir Konushevci”. /Telegrafi/