Dehari: E informova ministren Carovska për bojkotin e mundshëm të mësimit në shumë shkolla në komunën e Kërçovës

Kryetari i Komunës së Kërçovës, Fatmir Dehari në takimin e sotëm me gazetarët theksoi se e ka informuar ministren e Arsimit dhe Shkencës, Mila Carovskën për bojkotin e mundshëm të mësimit në shumë shkolla në komunë, posaçërisht në zonat rurale dhe se do të solidarizohet me këshillat e prindërve nëse kjo ndodh.

“Prindërit kanë të drejtë të reagojnë. Unë e informova ministren përmes një letre se ka mundësi që të kemi bojkot nga nxënësit dhe këshilli i prindërve të disa shkollave. Ne si komunë i informuam përfaqësuesit e ministrisë për të gjitha kushtet që i plotësojnë shkollat ​​tona, veçanërisht në pjesën rurale të cilët i kanë zbatuar të gjitha masat sipas protokolleve që dalin nga institucionet përkatëse shëndetësore. Në shkollat ​​në pjesën rurale të komunës ku nuk kemi internet me një kapacitet më të madh, numri i nxënësve është relativisht i vogël dhe mbi të gjitha i kemi ndërmarrë të gjitha masat mbrojtëse sipas protokollit.

Një deklaratë tjetër me shkrim duhet të merret nga secili prind individualisht se ata pajtohen me këtë dhe se të gjithë do të punojnë në përputhje me protokollet shëndetësore. Asnjë aspekt nuk duhet të neglizhohet kur bëhet fjalë për shëndetin e të gjithë aktorëve në procesin arsimor dhe ky fakt nuk duhet të harrohet”, tha Dehari.