De la Fuente mund të përballet me akuza për dëshmi të rreme në rastin e puthjes Rubiales-Hermoso

Përzgjedhësi i Spanjës, Luis de la Fuente mund të akuzohet për dëshmi të rreme, në rastin e puthjes së ish-presidentit Luis Rubiales me lojtaren Jennifer Hermoso.

Përzgjedhësi La Fuente dëshmoi të martën gjatë seancës së dytë gjyqësore në lidhje me rastin.

Sipas AS dhe Cadena SER, prokuroria po konsideron të akuzojë de la Fuenten për dhënie dëshmi të rreme. Baza për këtë janë dy pika kyçe: prania e tij në një takim në zyrën e Luis Rubiales, siç pohojnë dëshmitarët se ishte aty, ndërsa ai këmbëngul se ishte në një dhomë tjetër.

Çështja e dytë ka të bëjë me ndërgjegjësimin e tij për veprimet e ndërmarra në aeroplan për të justifikuar Rubiales.

Gjatë hetimeve paraprake, ai pranoi se kishte dijeni për to, por të martën, ai pretendoi se ishte “në gjumë” dhe nuk kishte dijeni për asgjë.

Gjatë gjithë dëshmisë së tij, de la Fuente pohoi se prania e tij në takimin në zyrën e Rubiales, ku u diskutuan strategjitë pas skandalit, ishte vetëm për “të folur për futbollin”.

“Isha në një pjesë tjetër të zyrës, më duhej të punoja në listën e skuadrës dhe kishte disa çështje që kërkonin diskutim”, shpjegoi përzgjedhësi i kombëtares spanjolle. /Telegrafi/