Daka: Vetëvendosje, PDK dhe Lista Serbe garojnë me nga katër kandidatë në zgjedhjet në veri (Video)

Kryetarja e Komisionit Qendror të Zgjedhjeve, Valdete Daka, në një intervistë të dhënë për Telegrafin, ka folur rreth procesit të zgjedhjeve të jashtëzakonshme për kryetar në komunat: Mitrovicë e Veriut, Leposaviq, Zubin Potok dhe Zveçan. 

Gjatë intervistës, Daka tregon për subjektet politike dhe kandidatët që janë certifikuar. Gjithashtu, ajo flet edhe për buxhetin që kanë planifikuar për organizmin e këtyre zgjedhjeve, si dhe për rolin që OSBE do ta ketë me 19 maj, ditën e zgjedhjeve.

“Ka përfunduar afati për aplikim të kandidatëve për kryetar të katër komunave. Afat shtesë nuk do të ketë, sepse kandidatët të cilët e kanë pasur ndërmend të aplikojnë, tashmë i kanë sjell aplikacionet e tyre”, ka thënë Valdete Daka për Telegrafin.

Ajo tregoi se sa kandidatë janë certifikuar për zgjedhjet e jashtëzakonshme.

“I kemi gjithsej 12 kandidatë, i kemi këto subjekte politike, Lëvizjen Vetëvendosje, PDK-në, dhe Listën Serbe të cilat kanë aplikuar me nga katër kandidatë”, ka sqaruar Daka.

Daka foli edhe rreth rolit që OSBE do ta ketë në zgjedhje.

“Do të jetë roli që kanë pasur edhe në zgjedhjet e vitit 2017, pra OSBE do të ofrojë këshilla teknike për komisionet komunale zgjedhore, dhe këshilla teknike rreth votimeve në ditë e zgjedhjeve, rol i limituar, dhe vetëm këshillëdhënës – asgjë tjetër”, tha Daka.

Ndryshe, zgjedhjet e jashtëzakonshme në komunat veriore do të mbahen me 19 maj.

Presidenti i Kosovës, Hashim Thaçi, ka marrë vendim që të shpallë zgjedhjet e jashtëzakonshme për komunat: Mitrovicë e Veriut, Zubin Potok, Leposaviq dhe Zveçan, pasi kryetarët e tyre dhanë dorëheqje të parevokueshme. /Telegrafi/